شەتەلدىك اۋە كومپانيا قازاقستانعا رەيستەرىن ۋاقىتشا توقتاتتى

تاياۋ شىعىستاعى شيەلەنىسكە بايلانىستى Air Arabia جانە Flydubai اۋە كومپانيالارى قازاقستان مەن تاعى بىرنەشە ەلگە رەيستەرىن توقتاتتى، دەپ حابارلايدى “ادىرنا” ۇلتتىق پورتالى. Air Arabia-نىڭ رەسمي مالىمەتىنشە، 13 جانە 14 ماۋسىم كۇندەرى يران، يراك، يوردانيا، ارمەنيا، وزبەكستان، ءازىربايجان، گرۋزيا، قىرعىزستان مەن قازاقستانعا رەيستەر ورىندالمايدى. سونىمەن قاتار كەيبىر باعىتتاردا رەيستەر كەشىكتىرىلۋى نەمەسە باعىتى وزگەرۋى مۇمكىن. Flydubai دا بۇعان دەيىن تمد ەلدەرىنە، سونىڭ ىشىندە قازاقستانعا باعىتتالعان رەيستەرىن توقتاتقان بولاتىن. اۋە كومپانيالارى مۇنداي شەشىمدى تاياۋ شىعىستاعى قاۋىپسىزدىك جاعدايىنىڭ كۇرت ناشارلاۋىمەن بايلانىستىرىپ وتىر. «جولاۋشىلارىمىز بەن ەكيپاجدىڭ قاۋىپسىزدىگى – ءبىزدىڭ باستى باسىمدىعىمىز. كەلتىرىلگەن قولايسىزدىقتار ءۇشىن كەشىرىم سۇرايمىز»، – دەلىنگەن Flydubai ءباسپاسوز قىزمەتى تاراتقان حابارلامادا. سونىمەن قاتار، Air Astana كومپانياسى دا جولاۋشىلارعا ۇندەۋ جاساپ، يزرايل مەن يران اراسىنداعى جاعدايعا بايلانىستى كەيبىر رەيستەر باعىتىن وزگەرتەتىنىن حابارلادى. قازاقستاننىڭ اۆياتسيا اكىمشىلىگى دە يران، يزرايل، سيريا، يراك، يوردانيا جانە ليۆان ەلدەرىنىڭ اۋە كەڭىستىگىندە ۇشۋعا تولىق تىيىم سالىنعانىن مالىمدەدى.