قازاقستاندىق سۋعا ءجۇزۋشى ادەلايدا پچەلينتسەۆا تۇركيادا ءوتىپ جاتقان يسلام ويىندارىندا التىن مەدال يەلەندى، - “ادىرنا” ۇلتتىق پورتالى Vesti.kz سايتىنا سىلتەمە جاساپ.
23 جاستاعى پاۆلودارلىق سپورتشى 50 مەترگە براسس تاسىلىمەن ءجۇزۋ جارىسىندا توپ جارىپ، يسلام ىنتىماقتاستىق ويىندارىنىڭ التىن مەدالىن جەڭىپ، وسى جارىستىڭ رەكوردىن جاڭارتتى.
ادەلايدا پچەلينتسەۆا - 50 مەتر قاشىقتىققا براسس ادىسىمەن ءجۇزۋ بويىنشا قازاقستان رەكوردىنىڭ اۆتورى. ول 2018 جىلى بۇل قاشىقتىقتى 31,55 سەكۋندتا باعىندىردى. بۇعان دەيىن باق ونى "قازاقستان سپورتىنىڭ جاڭا سەكس-سيمۆولى" دەپ اتاعان بولاتىن.
بەسىنشى يسلام ىنتىماقتاستىق ويىندارى 2022 جىلى 9-19 تامىز ارالىعىندا تۇركيانىڭ كونيا قالاسىندا وتەدى. 24 سپورت بويىنشا جارىسقا 56 ەلدەن ءتورت مىڭنان استام سپورتشى قاتىسىپ جاتىر. بارلىعى 355 مەدال ويناتىلادى.
”ادىرنا” ۇلتتىق پورتالى
