الماتى وبلىسىندا بالاباقشانىڭ كارىز قۇدىعىنا قۇلاپ كەتكەن ءۇش جاسار ءبۇلدىرشىن اۋرۋحانادا كوز جۇمدى، دەپ حابارلايدى "ادىرنا" پورتالى. بۇل تۋرالى وبلىستىق پوليتسيا دەپارتامەنتىنىڭ (پد) باسشىسى باۋىرجان الەنوۆ مالىمدەدى.
«13 قىركۇيەك كۇنى ساعات 13:08 شاماسىندا ەڭبەكشىقازاق اۋدانىنىڭ پوليتسيا بولىمىنە قىربالتاباي اۋىلىنداعى بالاباقشالاردىڭ ءبىرىنىڭ اۋماعىندا ءۇش جاسار ءبۇلدىرشىننىڭ اشىق كارىز سەپتيگىنە قۇلاپ قايتىس بولعانى تۋرالى حابارلاما كەلىپ ءتۇستى»، - دەدى الەنوۆ الەۋمەتتىك جەلىدەگى پاراقشاسىندا.
قر قىلمىستىق كودەكسىنىڭ 141-بابىنىڭ 2-بولىگى (بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ) بويىنشا قىلمىستىق ءىس قوزعالدى.
«قازىرگى ۋاقىتتا وقيعانىڭ بارلىق ءمان-جايىن تولىق، وبەكتيۆتى جانە جان-جاقتى زەردەلەۋ ءۇشىن قاجەتتى ساراپتامالار تاعايىندالىپ، جەدەل-ىزدەستىرۋ شارالارى جۇرگىزىلۋدە. تەرگەۋ بارىسىن باقىلاۋعا الدىم»، - دەپ قوستى الەنوۆ.
"ادىرنا" ۇلتتىق پورتالى
