قازۇۋ تۇلەگى وركەن ەرزاتتى پوليتسەيلەر ميتينگكە شىقتى دەپ جازىقسىز قاماۋعا الدى، دەپ حابارلايدى "ادىرنا" سايتى. بۇل تۋرالى جانسايا سمان الەۋمەتتىك جەلىدە جازدى.
جانسايا سماننىڭ جازباسىنان:
ەلىمىزدەگى قايعىلى جاعداي جازىقسىز تالاي جاننىڭ وبالىنا قالدى. سونىڭ ءبىرى -- قازۇۋ-دىڭ فيلولوگيا فاكۋلتەتىن بىلتىر عانا بىتىرگەن ەرزات وركەن. ماگيستراتۋرادا وقىپ جۇرگەندە پراكتيكالىق ساباقتا وركەننىڭ توبىنا ساباق بەردىم. توپتىڭ ىشىندەگى ءبىلىمدى، ءوز ىسىنە جاۋاپتى ستۋدەنتتىڭ ءبىرى، ادەبيەتتەگى قانشاما قۇندى ەڭبەكتەردى وقىپ، تالداپ وتىراتىن. ال وسىنداي جاستى ايىپتى دەپ اتاۋعا بولا ما؟!
تۋعان اپكەسىنىڭ ايتۋىنشا، 5-قاڭتار كۇنى بەيبىت شەرۋ ماڭىنان ءوتىپ بارا جاتقان ول اياعىنا تيگەن بەلگىسىز زاتتان (مۇمكىن وق) جارالانادى. سودان كەيىن 13 كۇنى پوليتسيالار كەلىپ سۇراق-جاۋاپ الامىز دەپ الىپ كەتكەن. تۇسىنىكتى بولۋى ءۇشىن اپكەسىنىڭ جازعانىن سالىپ وتىرمىن:
"13.01.2022ج 12:40تا الىپ كەتكەسىن ينتەرنەت ارقىلى قۇزىرلى ورگاندارعا قابارلاسىپ وركەننىڭ ريحاردا زورگە 14 تە ەكەنىن ءبىلدىم، ءىنىمدى الىپ كەتەردە اۋىرىپ تۇرعان ەدى، ءۇي كيىمىمەن الىپ كەتتى جۇقا ەدى.
1-2ساعاتتىق سۇراق جاۋاپ تەرگەۋگە ۇلاسىپ كەتىپتى. تەرگەۋ اياقتالماسادا ءدارى، جىلى كيىم تاماق اپارسام بولاما دەپ سۇرادىم.
ساعات ول كەزدە 19:00لەر شاماسى كەزەكشى جاۋاپ بەرۋشى يا دەپ جاۋاپ بەردى. بارساق ماسانچي 57ا عا الىپ كەتىپتى.
22:00لەر شاماسىندا ءبىر مينۋت قانا سويلەسىپ ۇلگەردىم: "ماسانچيدامىن، ميتينگكە شىقتىڭ دەپ ايىپتاپ جاتر، تەلەفونىمدى الادى "- دەدى. مەن ادۆوكات دەپ قانا ايتىپ ۇلگەردىم. ارى قاراي ءۇزىلىپ كەتتى سودان بەرى ءىنىمنىڭ قانداي كۇي كەشىپ جاتقانىن بىلمەيمىن.
14.01.2022ج تاڭمەن تالاسىپ ماسانچي57ا جاقتا بولدىق، ىشكە كىرگىزبەيدى، ەش اقپارات بەرىلمەيدى. 12:00دەن اسقانشا سول جەردە ءبىر قابارى بولار دەپ ۇمىتپەن اينالسوقتاپ ءبىر جاعىنان ادۆوكات ىزدەپ ءجۇردىم، ادۆوكاتتارعا ءتۇسىندىرىپ ايتا باستاعاننان ساياساتقا بايلانىستى دەپ قاشتى.
تەك عابيت ومىربەك زاڭگەرلىك تەگىن كەڭەس بەرە وتىرىپ ادۆوكات تاۋىپ بەردى.
ساع 16:32دە مەن وركەننىڭ كەزەكشى ادۆوكاتىمىن دەپ ءسىزدىڭ نومەرىڭىزدى وركەن بەردى، ءوزى جايلى اقپارات بەرۋىمدى ايتتى دەپ قابارلاستى.
15.01.2022ج تۇندە اياق استى سانكتسيا بولدى. شەشىم بويىنشا 272باپتىڭ 2-تارماعىمەن كۇدىكتى رەتىندە يۆس-18 گە ەكى اي تەرگەۋدە بولاتىنى بەلگىلى بولدى.
17.01.2022ج تاڭعى ساعات 6:00دەن كەزەكتە تۇرىپ كيم-كەشەك، ءدارى-دارمەك، تاماق اپارىپ بەرمەكشى بولىپ تۇسكە دەيىن ءىنىمدى بازادان تاپپاي ساندالدىم. اقىرى وركەننىڭ 15كۇنى تۇندە وسىندا تۇسكەنىن، بىراق بازادا ءالى تىركەلمەگەنىن انىقتادىم. قاشان بازاعا ەنەتىنىن، قاشان جولىعا الاتىنىمىزدى ەشكىم ايتا المايدى...
"جاسقا تولماعان بالام بار، جاس انامىن. باۋىرىمدى اكەتكەلى ۇيقىدا، تامقتا، كۇلكىدە قاشتى مەنەن" دەپ ەڭىرەگەندە ەتەگى جاسقا تولدى اپكەسىنىڭ.
باۋىرىم وركەننىڭ الماتىداعى جالعىز جاناشىرى مەنمىن. سوندىقتان بەرىلمەي كۇندىز ءتۇنى ءىنىمدى اقتاۋعا بولاتىن بارلىق مۇمكىندىكتى پايدالانىپ قالعىم كەلەدى.
اتا-انامىز الىستا سەت ۇستامايدى. تەك وزدەرى قابارلاسقاندا عانا سويلەسە الامىز.
ادۆوكات بۇگىن عانا وردەر الدى، مەن قوعامدىق قورعاۋشى بولۋعا ارىز جازامىن، بىراق قازىرگى تاڭدا تەرگەۋشىسى كىم، ايىپتاۋشىسى كىم بەلگىسىز باعىتتالعان ارىزدا جازا الماي وتىرمىن.
جازىقسىزدار تەزىرەك اقتالسا ەكەن" دەدى وركەننىڭ اپكەسى.
وسىلاي نەبارى 22 جاستاعى جىگىت جازىقسىز ايىپتالىپ وتىر. بىرنەشە كۇننەن بەرى جاعدايىنان بەيحابار. جالعىز جاناشىرى -اپكەسى.
بولاشاعىنان ۇلكەن ءۇمىت كۇتەر بۇل جىگىتتىڭ ومىرىنە تونگەن قاۋىپكە اراشا بولىڭىزدارشى. ناقتى اينالىساتىن ادام بولسا، اپكەسىنىڭ ءنومىرىن بەرەمىن. ەلىمىزدىڭ ءۇمىتى جاستاردىڭ ساعىن بۇلاي سىندىرماڭىزدارشى، دەپ جازدى جانسايا سمان ءوزىنىڭ Facebook پاراقشاسىندا.
