قاڭتاردا ورىن العان تارتىپسىزدىكتەر جايلى جارىسا جازعان رەسەيلىك باق وكىلدەرى ەلدەگى جاعداي تۋرالى پىكىر ءبىلدىردى. Gazeta.ru باسىلىمىنا سۇحبات بەرگەن جوعارى ەكونوميكا مەكتەبىنىڭ پروفەسسورى، ساياساتتانۋ عىلىمدارىنىڭ دوكتورى اندرەي كازانتسەۆ توقاەۆ پەن نازارباەۆ اراسىنداعى داۋدىڭ اسىرەلەپ كورسەتىلگەنىن مالىمدەدى. سونىمەن قاتار نازارباەۆتىڭ وتباسى مەن قاسىم-جومارت توقاەۆ اراسىندا راسىمەن جانجال بولعانىن قوسىپ ءوتتى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.
ساياساتتانۋشىنىڭ سوزىنشە، نازارباەۆ توقاەۆقا بارلىق بيلىكتى بەرۋ ارقىلى كەلىسىمگە كەلدى. ەسەسىنە ول “قازاقستانداعى تاۋەلسىزدىك مەن زاماناۋي مەملەكەتتىكتىڭ سيمۆولى” بولىپ قالدى. ونىڭ ويىنشا، اراداعى جانجال تۇڭعىش پرەزيدەنتتىڭ كۇيەۋ بالالارى مەن جيەندەرىن قىزمەتتەن بوساتۋ ارقىلى شەشىلگەن.
“بۇل شەشىم توقاەۆ ءۇشىن دە، نازارباەۆ ءۇشىن دە پايدالى بولدى. قاسىم-جومارت توقاەۆ بيلىككە يە بولدى، ال نازارباەۆتىڭ وتباسىنان بەلگىلى زاتتاردى تارتىپ العانىمەن، ەشكىمدى اباقتىعا جاپپايدى. بۇل ايقىن كورىنىپ تۇردى: باسىنان باستاپ ەلباسىنىڭ تۋىسى بولىپ تابىلمايتىن ازاماتتار عانا تۇتقىنعا الىندى”، – دەدى اندرەي كازانتسەۆ.
سونىمەن قاتار ساراپشى توقاەۆتىڭ كەلۋىنە بايلانىستى نۇرسۇلتان نازارباەۆتىڭ كەي جوسپارلارى ىسكەي اسپاي قالعانىن ايتادى. بۇرىنعى پرەزيدەنت وكىلەتتىگىن بىرتە-بىرتە بەرىپ، كۇشتىك بلوكتى ءومىرىنىڭ سوڭىنا دەيىن ۇستاپ قالماقشى بولعان. الايدا بۇل ول ويلاعاننان دا جىلدام جۇرگەن.
“قازاقستاندا ەكى تۇلعانىڭ كەلىسىمگە كەلىپ، قاڭتارداعى داعدارىستىڭ اياقتالعانى ماڭىزدى. ەليتاىشىلىك جاعداي تۇراقتالدى. ەندى قازاقستاندا كىمنىڭ باسشى ەكەنى تۇسىنىكتى بولدى ءارى جانجال دا جوق.
بۇدان بولەك توقاەۆ پەن نازارباەۆ اراسىنداعى داۋ تۋرالى قاۋەسەت تە جوققا شىعارىلدى. سەبەبى نازارباەۆ بارلىعىن ءوزى مويىندادى”، – دەپ قوستى ساياساتتانۋشى.
بۇرىن پرەزيدەنتتىككە ۇمىتكەر بولعان جۋرناليست ءامىرجان قوسانوۆ قازاقستانداعى جاعدايدىڭ ءالى دە قيىن ەكەنىن مالىمدەدى. سەبەبى ناقتى اقپارات جوق، ال بۇل مەملەكەت ءۇشىن قاۋىپتى دەيدى.
“مەنى نازارباەۆتىڭ جانىندا توقاەۆتىڭ بولماعىنى الاڭداتتى. ەكەۋى قاتار وتىرىپ، حالىققا نە بولىپ جاتقانىن ءتۇسىندىرسىن. توقاەۆ پەن نازارباەۆتى سالىستىرۋعا بولمايدى. ەگەر توقاەۆ رەفورما جۇرگىزگىسى كەلسە، حالىققا ۇندەۋ جاساپ، ورىن العان جاعدايعا قاتىستى جەكە ويىن ءبىلدىرسىن. ازىرگە ءبىز مۇنى كورە المادىق. مەملەكەتكە نە بولاتىنىن ناقتى شەشۋى كەرەك”، – دەدى ول Gazeta.ru باسىلىمىنا بەرگەن سۇحباتىندا.
“ادىرنا” ۇلتتىق پورتالى
