پرەزيدەنت توقاەۆ استانادا ءىرى بيزنەس وكىلدەرىمەن كەزدەسۋ وتكىزدى. كوپتەگەن جاقسى باستامالار كوتەرىلدى. ءبىز ونىڭ "گەگەلدى بابەلدەن" اجىراتا المايتىن "مىقتى" كاسىپكەرلەر تۋرالى ايتقان كەزدە ونىڭ كىمدەردى مەڭزەپ تۇرعانىن جاقسى تۇسىندىك.
ءوزى وندىرەدى، ءوزى قايتا وڭدەيدى، ءوزى بانكتەردى باسقارادى دەپ مونوپوليالار تۋرالى ايتقاندا دا، ءبىز ونىڭ كىمدى ايتىپ وتىرعانىن جاقسى تۇسىندىك.
ارينە، بارلىق باستامالار جاقسى، بىراق كەمشىن تۇستار دا جوق ەمەس. كوپتەگەن تاپسىرمالاردى ىسكە اسىرۋ مەحانيزمى تۇسىنىكسىز. مىسالى، اسا ءىرى بيزنەسمەندەر ءوز تابىستارىنىڭ بەلگىلى ءبىر پايىزىن حالىق قورىنا قالاي اۋدارادى؟ قانشا پايىزىن؟ قانداي جيىلىكپەن؟ ونىڭ نەگىزدەمەسى قانداي بولماق؟ مەنىڭ ويىمشا، بۇل زاڭدى سحەما ەمەس، ونى اينالىپ ءوتۋ، باسقاشا تالداۋ، اقىرىندا ءتىپتى ودان قاشىپ قۇتىلۋ وپ-وڭاي.
⠀
مەنىڭ ويىمشا، ەگەر ولاردا قانداي دا ءبىر ۋاعدالاستىقتار مەن قاۋىپسىزدىك كەپىلدىكتەرى بولسا، بۇرىنعى بيلىككە جاقىن كاپيتالدى زاڭداستىرۋ سحەماسى الدەقايدا تۇسىنىكتى، ءادىل جانە تۇراقتى بولار ەدى، ياعني ولار ءبىر رەتتىك، ۇلكەن مۇلىك سالىعىن تولەيدى دە، زاڭ اياسىندا ادەتتەگىدەي جۇمىسىن جالعاستىرا بەرەدى. راقىمشىلىقتىڭ ءبىر ءتۇرى. بۇل پروتسەدۋرا ءۇشىن "تاريحي ادىلەتتىلىكتى قالپىنا كەلتىرۋ تۋرالى" ارنايى زاڭ قابىلداۋعا بولادى، وعان سايكەس وتكەن بيلىككە جاقىن بارلىق كاسىپكەرلەر ءوز كاپيتالىن زاڭداستىرۋعا مىندەتتى بولسىن. بۇل دۇرىس، ءارى زاڭدى جول بولار ەدى.
⠀
قىسقاسى، مەنىڭ تۇسىنۋىمشە، توقاەۆتىڭ بۇگىنگى مەسسەدجى ءوز كاپيتالىن بۇرىنعى بيلىك كەزىندە جيناعان بيزنەسمەندەرگە، سونداي-اق بيزنەس پەن بيلىك اراسىنداعى قارىم-قاتىناس تۋرالى جاڭا قوعامدىق شارتتىڭ دەكلاراتسياسىنا كوبىرەك باعىتتالدى.
"ادىرنا" ۇلتتىق پورتالى
