كادەگە جاراتۋ الىمى ماسەلەسى بويىنشا جۇمىس توبىنىڭ العاشقى وتىرىسى ءوتتى. جيىندا اۋىل شارۋاشىلىعىنا قاجەتتى تەحنيكا شىعاراتىن كومپانيالار مەن اۆتوسالوندار ۋتيليزاتسيالىق جيناقتى الماۋ كەرەك ەكەنىن مالىمدەدى. ولار مەملەكەت باقىلاۋىنا وتكەن سوڭ دا، بۇرىنعى ءتارتىپ بويىنشا جۇمىس ىستەۋگە شاقىرادى. ال قوعام بەلسەندىلەرى ۋتيلدىك الىمدى قالدىرۋدى قالايتىن توپ سۇراقتارعا ماردىمدى جاۋاپ بەرمەگەنىن ايتادى، دەپ حابارلايدى "ادىرنا" ۇلتتىق پورتالى 31-ارناعا سىلتەمە جاساپ.
العاشقى جيىندا اۆتوسالوندار مەن قاراپايىم حالىقتىڭ ءسوزىن سويلەگەندەر اراسىنداعى قىزۋ تالقى ءوتتى. جيىنعا كوبىنە ۋتيل الىمدى وزگەرىسسىز قالدىرۋعا نيەتتى ادامداردى قوستى دەگەن نۇراددين سادىقوۆ كاسىپكەرلەر قالتاسىن ويلاپ، حالىقتىڭ مۇددەسىن ىسىرىپ تاستادى دەيدى.
"برەكەشەۆ باستاعان مينيسترلىكتىڭ بۇگىنگى ارەكەتىنە قاراپ باعا بەرىپ وتىرعانىمىز. بۇل قازىرگى تاڭدا وليگارحتار تاراپىنا باسىمدىق بەرگىسى كەلىپ وتىرعان سىڭاي تانىتتى. بۇل وتە الاڭداتارلىق ماسەلە", – دەيدى "ۋتيل الىمعا جول جوق" قوزعالىسىنىڭ بەلسەندىسى نۇراددين سادىقوۆ.
ال قازىناعا جىلىنا ميللياردتاپ سالىق تولەپ وتىرمىز دەگەن اۆتوسالوندار ۋتيل الىمىن جويۋعا، ءتىپتى مولشەرلەمەسىن تومەندەتۋگە مۇلدە قارسى ەكەن. ەلدە ۋتيليزاتسيالىق الىم تومەندەتىلسە، شەتەل كولىكتەرى كوپتەپ كىرگىزىلىپ، ەكولوگياعا دا كەرى اسەرىن تيگىزەدى دەيدى.
"ۋتيليزاتسيالىق الىمدى جويۋعا ءبىز قارسىمىز. ونىڭ كوەففيتسيەنتىن ازايتقاننان پايدا جوق. ءبىز تولەپ جاتقان سالىقتى مەملەكەتتىك باعدارلاماعا قولدانا بەرىڭىزدەر. بىراق ۋتيل الىمدى وزگەرىسسىز قالدىرۋلارىڭىزدى سۇرايمىز", – دەدى اۆتوسالون وكىلى رۋسلان كامزين.
ەكى ساعاتقا سوزىلعان ونلاين جيىندا تاراپتار ءبىر مامىلەگە كەلە المادى. ەندى الداعى سەيسەنبىگە دەيىن جۇمىس توبىنىڭ مۇشەلەرى ەكولوگيا مينيسترلىگىنە ءوز ۇسىنىستارىن جولداۋ كەرەك. ەكىنشى وتىرىس قاشان بولاتىنى ازىرگە بەلگىسىز.
ايتا كەتەيىك، بۇعان دەيىن قازاقستاندىق كولىك جۇرگىزۋشىلەرى ۋتيل الىمىنىڭ 100 مىڭ تەڭگەدەن اسپاۋ كەرەگىن ايتىپ، پرەزيدەنتكە پەتيتسيا جولداعان ەدى.
"ادىرنا" ۇلتتىق پورتالى.
