مەملەكەت باسشىسى قاسىم-جومارت توقاەۆ كاسپي تەڭىزى ارقىلى وتەتىن جانە ونىڭ ماڭىنداعى تاسىمال جولدارىنا نازار اۋداردى. بۇل تۋرالى اقوردا جازدى، دەپ حابارلايدى "ادىرنا".
مەملەكەت باسشىسى بۇگىن، 12 جەلتوقساندا اشعابادتا حالىقارالىق بەيبىتشىلىك جانە سەنىم جىلىنا، حالىقارالىق بەيتاراپتىق كۇنى مەن تۇركىمەنستاننىڭ تۇراقتى بەيتاراپتىعىنىڭ 30 جىلدىعىنا ارنالعان فورۋمعا قاتىستى.
توقاەۆ فورۋمدا كاسپي تەڭىزى ارقىلى وتەتىن جانە ونىڭ ماڭىنداعى تاسىمال جولدارى تۋرالى ءسوز قوزعادى.
"قازاقستان ترانسكاسپي حالىقارالىق كولىك باعدارىنىڭ مۇمكىندىكتەرىن ءتيىستى دەڭگەيدە كەڭەيتىپ، تەمىرجول، پورت، اۆتوجول ينفراقۇرىلىمىن جاڭعىرتىپ جاتىر. وسىلايشا، ءبىرتۇتاس ترانسپورت جۇيەسىن قالىپتاستىرۋعا كىرىستى. ەلىمىز ورتالىق ازيانىڭ كولىك جۇيەسىن دامىتۋدىڭ كەشەندى ستراتەگياسىن ازىرلەۋگە بەلسەندى اتسالىسۋدا. ماقساتىمىز – ورنىقتى لوگيستيكا باعىتتارىن تولىق ىسكە قوسۋ. رەسەي، قىتاي، يران، تۇركيا، ازەربايجان، ارمەنيا، گرۋزيا جانە باسقا دا مۇددەلى مەملەكەتتەرمەن تىعىز ىنتىماقتاستىق ورناتىپ، بىرلەسكەن كۇش-جىگەر ارقىلى تۇتاس ەۋرازيا كەڭىستىگىندە بارشامىزعا ءتيىمدى زاماناۋي كولىك-لوگيستيكا جۇيەسىن قالىپتاستىرا الامىز", – دەدى پرەزيدەنت.
