3 قاراشادا مونيتورينگ ناتيجەسىندە 112 يتبالىقتىڭ ولەكسەسى انىقتالدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
جايىق–كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ قىزمەتكەرلەرى ماڭعىستاۋ وبلىسى، تۇپقاراعان اۋدانى اۋماعىنداعى كاسپي تەڭىزى جاعالاۋىندا مونيتورينگ جۇرگىزۋ كەزىندە يتبالىقتاردىڭ ولەكسەسىن تاپقان.
گيدروبيولوگيا جانە ەكولوگيا ينستيتۋتىنىڭ حابارلاۋىنشا، يتبالىقتاردىڭ ولەكسەلەرى ابدەن ءشىرىپ كەتكەن. الدىن الا بولجام بويىنشا، جانۋارلار شامامەن ءبىر اي بۇرىن قىرىلعان بولۋى مۇمكىن. داۋىلدى جەلدىڭ اسەرىنەن ولەكسەلەر ەندى عانا تۇپقاراعان جاعالاۋىنا شىعىپ قالعان.
ماماندار يتبالىقتاردىڭ قىرىلۋىنا يممۋنيتەتتىڭ السىرەۋى جانە ينفەكتسيالىق اۋرۋلارعا بەيىمدەلگىشتىكتىڭ ارتۋى سەبەپ بولۋى ىقتيمال ەكەنىن ايتادى.
«باعدارلامالىق-نىسانالى قارجىلاندىرۋ شەڭبەرىندە كاسپي يتبالىعىن زەرتتەۋمەن اينالىساتىن عىلىمي ۇيىم ماماندارى يتبالىق ولەكسەلەرىنەن سىناما الىپ، زەرتتەۋ جۇرگىزىپ جاتىر»، — دەلىنگەن ينستيتۋتتىڭ حابارلاماسىندا.
بارلىق ولەكسەلەر سانيتارلىق تالاپتارعا ساي جينالىپ، جويىلعانى تۋرالى اقپارات تارادى. قازىر كاسپي تەڭىزى جاعالاۋىن باقىلاۋ جانە زەرتتەۋ جۇمىستارى جالعاسۋدا.
