قازاقستاندىق ساياساتتانۋشى دانيار اشىمباەۆ ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆتىڭ اراسىندا قاقتىعىس بولدى دەگەن پىكىردى جوققا شىعاردى. ايتۋىنشا، ەلىمىزدە 2024 جىلى وتەتىن سايلاۋدا توقاەۆتىڭ جەڭىسكە جەتكەنىن قالامايتىندار بار. ونىڭ سالدارى ەلىمىزدە بولعان قاقتىعىستارعا الىپ كەلگەن بولۋى مۇمكىن. بۇل تۋرالى اشىمباەۆ ia-centr.ru باسىلىمىنا بەرگەن سۇحباتىندا ايتتى، دەپ حابارلايدى "ادىرنا" ۇلتتىق پورتالى stan.kz-كە سىلتەمە جاساپ.
- كوپشىلىك توقاەۆتىڭ ء“ترانزيتتى پرەزيدەنت” ەكەنىنە سەنىمدى بولدى. بىراق Nur Otan پارتياسى توراعالىعىن بەرۋى مۇنى تەرىسكە شىعاردى. سەبەبى بۇل پوست ونىڭ ماجىلىسكە دە، ۇكىمەتكە دە بيلىگى جۇرەتىنىن كورسەتەدى. ەڭ باستىسى، توقاەۆتىڭ 2024 جىلعى سايلاۋعا تۇسەتىنىن بىلدىرەدى، – دەدى ساياساتتانۋشى.
اشىمباەۆتىڭ پىكىرىنشە، ەلىمىزدە الدا بولاتىن سايلاۋدا توقاەۆتىڭ جەڭىسكە جەتكەنىن قالامايتىن ادامدار بولعان جانە ءالى دە بار.
- نازارباەۆتىڭ ول نۇسقانى قاراستىرمايتىنى جانە شەشىمىن وزگەرتپەيتىنى تۇسىنىكتى بولعاندىقتان، ول ءبىزدىڭ باسىمىزدان وتكەن قارسىلىقتار تولقىنىن تۋدىرعان بولۋى مۇمكىن. سوندىقتان ەليتالار اراسىندا قاقتىعىس بولدى، بىراق نازارباەۆ پەن توقاەۆتىڭ اراسىندا ەمەس، – دەپ ءتۇسىندىردى ساياساتتانۋشى.
ماماننىڭ پىكىرىنشە، نازارباەۆتىڭ تۋىستارىنان بولەك، ءوزىنىڭ ساياساتتاعى بولاشاعىن ويلاعان وزگە دە تۇلعالار بولعان. مىسالى – ۇقك-ءنىڭ بۇرىنعى باسشىسى كارىم ءماسىموۆ. قازىرگى ۋاقىتتا ول مەملەكەتتىك ساتقىندىق پەن توڭكەرىس جاساۋعا تىرىستى دەپ كۇدىكتەلۋدە.
ساياساتتانۋشى توقاەۆتىڭ بانديتتەردى جەڭگەنىن اتاپ ءوتتى. الايدا كەيبىرەۋلەر مۇنى نازارباەۆتى جەڭدى دەپ كورسەتكىسى كەلەدى، دەيدى ول.
“بىراق بۇل نازارباەۆتىڭ دا جەڭىسى. سەبەبى ونىڭ ءىزباسارى مەن باعىتى ورنىندا قالدى. ال ءىزباسارى مەملەكەتتى العا جەتەلەي الاتىن مىقتى كوشباسشى رەتىندە كورسەتتى. نازارباەۆتىڭ قالاۋى دا سول ەدى. سوندىقتان بۇل نازارباەۆتىڭ دا جەڭىسى”، – دەدى ساياساتتانۋشى.
"ادىرنا" ۇلتتىق پورتالى
