قىزىلوردادا جاپپاي تارتىپسىزدىككە قاتىسقان ەكى كوپبالالى انا ۇستالدى. قىزىلوردا پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، ۇستالعاندار قاڭتار وقيعاسىنىڭ باسقا قاتىسۋشىلارىمەن بىرگە قىزىلوردا وبلىسى اكىمدىگىنىڭ عيماراتىنا باسىپ كىرگەن، - دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ
قىزىلوردا پوليتسيا دەپارتامەنتىنىڭ ءباسپاسوز قىزمەتى Facebook-تە قىزىلوردا وبلىسى اكىمدىگىنىڭ عيماراتىنا ءبىر توپ ادامنىڭ، ونىڭ ىشىندە ايەلدەردىڭ قالاي باسىپ كىرگەنىن كورسەتەتىن ۆيدەو جاريالادى. ال بۇل بەيبىت ميتينگىگە ۇقسامايدى.
"قىزىلوردادا 2022 جىل 5 قاڭتاردا بولعان جاپپاي تارتىپسىزدىك كەزىندە ەكى ازاماتشا ميتينگكە قاتىسۋشىلارمەن بىرگە وبلىس اكىمدىگىنىڭ عيماراتىنا زاڭسىز باسىپ كىرىپ، جاپپاي تارتىپسىزدىك جاساعان. ۆيدەودان كورىنىپ تۇرعانداي، ازاماتشا ن.ج. جانە ب.ز. تاس لاقتىرىپ، اكىمدىكتىڭ تەمىر قورشاۋىنا شىعىپ، ءبىر مەزگىلدە بالاعات سوزدەر ايتقان", - دەدى پوليتسيا دەپارتامەنتىنىڭ ءباسپاسوز قىزمەتى.
ۇستالعان ايەلدەرگە قاتىستى قىلمىستىق كودەكستىڭ 272-بابىنىڭ 2-بولىگى "جاپپاي تارتىپسىزدىككە قاتىسۋ" بويىنشا تەرگەۋ جۇرگىزىلىپ جاتىر.
"قازىرگى ۋاقىتتا ەكى ايەل دە قىلمىستىق ارەكەتتەرىن تولىق مويىندادى. دەنساۋلىقتارى مەن قامقورلىعىندا كامەلەتكە تولماعان بالالارى بار ەكەنىن ەسكەرە وتىرىپ، نەگىزگى جازا ۇيقاماققا اۋىستىرىلدى", - دەدى پوليتسەيلەر.
كوپبالالى انالاردىڭ ۇستالۋ دەرەگىن قىزىلوردا وبلىسىنىڭ تۇرعىندارى سىنعا الىپ، Facebook-تە ايەلدەردى بوساتۋدى تالاپ ەتكەن جازبالار جاريالادى. ولاردىڭ ءبىرى جەتى بالانىڭ اناسى، ەڭ كەنجەسى 7 ايلىق، ەمىزۋلى. ۇستالعان ەكىنشى ازاماتشا بەس بالانىڭ اناسى.
ۆەدومستۆونىڭ ءباسپاسوز قىزمەتى ءاربىر فاكت پوليتسيا تاراپىنان مۇقيات زەردەلەنەتىنىن باسا ايتتى. قورىتىندىسى بويىنشا قۇقىقتىق باعا بەرىلەدى.
قىزىلوردا وبلىسىنىڭ پوليتسيا دەپارتامەنتىنىڭ مالىمەتىنشە، توتەنشە جاعداي كەزىندە وبلىستىق پوليتسياعا 952 ادام جەتكىزىلگەن. توتەنشە جاعدايدى بۇزعانى ءۇشىن 414 ازامات اكىمشىلىك جاۋاپكەرشىلىككە تارتىلىپ، 253 قۇقىق بۇزۋشى اكىمشىلىك قاماۋعا الىندى، ونىڭ 73-ءى بوساتىلدى. قىلمىس جاسادى دەگەن كۇدىكپەن 97 ادام ۋاقىتشا ۇستاۋ يزولياتورىنا قامالدى. 12 ادامعا قاتىستى قاماۋعا الۋعا قاتىسى جوق بۇلتارتپاۋ شاراسى تاڭدالدى. ۇستالعانداردان: ءبىر بىرلىك تەگىس ۇڭعىلى جانە تراۆماتيكالىق قارۋ، 13 پىشاق، 9 قالقان، 4 كاسكا، 6 تاياق، وق وتپەيتىن جيلەت جانە ءبىر كەلى 150 گرامم ەسىرتكى زاتى تاركىلەندى.
"ادىرنا" ۇلتتىق پورتالى
