ەلىمىزدىڭ سولتۇستىگىندە سپيرتتىك ىشىمدىك ءىشىپ، ۇيىقتاپ قالعان شەنەۋنىكتىڭ ءىسى تارتىپتىك كەڭەستە قارالدى، دەپ حابارلايدى «ادىرنا» ءتىلشىسى حابار 24-كە سىلتەمە جاساپ.
تابيعي مونوپوليالاردى رەتتەۋ كوميتەتىنىڭ سولتۇستىك قازاقستان وبلىسى بويىنشا دەپارتامەنت باسشىسى اباي بالابەكوۆ وتكەن جىلدىڭ قاراشا ايىندا ماس كۇيىندە قوعامدىق ءتارتىپتى بۇزعان. مەملەكەتتىك قىزمەتشىنى ايالدامادا ۇيىقتاپ جاتقان جەرىنەن پاترۋلدىك پوليتسيا قىزمەتكەرلەرى تاۋىپ العان. كەيىن ءتارتىپ ساقشىلارى ونى بىردەن مەديتسينالىق كۋالاندىرۋعا اپارعان.
ساراپتاما قورىتىندىسى ونىڭ اششى سۋعا تويىپ العانىن كورسەتتى. ايتا كەتۋ كەرەك، بالابەكوۆتىڭ وسىعان دەيىن دە ادەپ كودەكسىن بۇزعاندىعى بەلگىلى بولدى. سوندىقتان تارتىپتىك كەڭەس مۇشەلەرى ونى قىزمەتتەن بوساتۋ تۋرالى ۇسىنىس جاسادى.
ماحاببات سامرات، مەملەكەتتىك قىزمەت ىستەرى اگەنتتىگى سقو بويىنشا دەپارتامەنتىنىڭ باس مامانى:
- اباي كليمەنوۆيچ بالابەكوۆ نەگىزىندە ءبىرىنشى رەت ادەپ كودەكسىنىڭ نورمالارىن بۇزىپ وتىرعان جوق. ونىڭ الدىندا 2020 جىلى ماس كۇيىندە كولىك تىزگىندەگەن. جانە ءوز كولىگىن ماس ادامعا جۇرگىزۋگە مۇمكىندىك بەرگەن.
«ادىرنا» ۇلتتىق پورتالى
