مەملەكەتتىك توڭكەرىس جاساۋشىلاردى بۇكىل ەل ءبىلۋى ءۇشىن پارلامەنتتىك تىڭداۋ وتكىزۋ كەرەك. بۇل تۋرالى «اق جول» پارتياسى مالىمدەدى، دەپ حابارلايدى «ادىرنا» ءتىلشىسى.
قر پارلامەنتى ءماجىلىسى دەپۋتاتى، “اق جول” فراكتسياسى مۇشەسى قازىبەك يسا قر باس پروكۋرورى ع.نۇرداۋلەتوۆكە جانە قر پرەزيدەنتى جانىنداعى ادام قۇقىعى جونىندەگى ۋاكىل ە.ازيموۆاعا دەپۋتاتتىق ساۋال جولدادى.
«تالايدى كورگەن تاريحىمىزدا 2022 جىلعى قاڭتارداعى قاندى قاسىرەت بۇكىل ەلىمىزدى ءدۇر سىلكىندىردى. مەملەكەتتىك توڭكەرىس جاساماق بولعاندار ءوز ماقساتتارىنا جەتۋى ءۇشىن ءتىپتى، ەڭ قاسيەتتى تاۋەلسىزدىگىمىزدىڭ ءوزىن قۇربان ەتە جازدادى. مەملەكەتىمىز ساقتالىپ قالدى، قۇدايعا شۇكىر، بىراق قانشاما ادامنىڭ قانى توگىلدى... پەيىشتە رۋحتارى شالقىپ، يماندارى سالامات بولسىن.
باسىندا الەۋمەتتىك ادىلەتتىلىكتەر سۇراپ، بەيبىت ميتينگىگە شىققان شەرۋشىلەردى كەيىن الماتىدان باستاپ، كوپتەگەن قالالاردا ارنايى دايىندالعان بۇلىكشىل توپتار پايدالانىپ كەتىپ، زاڭدى شەرۋدىڭ ارتى قاندى شەرۋگە اينالدى.
قاڭتارداعى قىرعىندا 227 ادام قازا تاپتى. جالپى 4500-دەن استام ادام زارداپ شەگىپ، 4353 ادام ءتۇرلى جاراقات العان.
مۇنداي قاسيەتتى قازاق تاريحىنا قارا تاڭبا سالعان قاندى قاسىرەت قايتا قايتالانباۋى ءۇشىن، مەملەكەتتىك توڭكەرىستى جاساماق بولعان كىمدەر، باسشىسى كىم، قوسشىسى كىم، ورىنداۋشىلارى كىمدەر، ءبارى تولىق انىقتالىپ، تۇگەل جاۋاپقا تارتىلۋى ءتيىس!
ەرەۋىل كەزىندە بەيبىت شەرۋگە شىققاندارى ءۇشىن عانا كوپ ادام، اسىرەسە، جاستارىمىز جازىقسىز تۇتقىندالىپ، سوققىعا جىعىلىپ، ازاپتالىپ جاتقاندارى تۋرالى ناقتى مالىمەتتەر مەن ۆيدەولار كەلۋدە. الەۋمەتتىك جەلىلەردە دە ءجيى جازىلۋدا.
تەك قىلمىس جاساعاندار عانا جاۋاپقا تارتىلۋى ءتيىس!
بۇنداي جازىقسىز جانداردى تۇتقىنداپ، ازاپتاۋ ناعىز ارانداتۋ، مەملەكەتكە، پرەزيدەنتتىڭ ساياساتىنا قارسى قاساقانا جاسالىپ جاتقان قاستاندىق دەپ سانايمىز.
ويتكەنى، پرەزيدەنت قاسىم-جومارت توقاەۆ ءاربىر ءىستىڭ ءادىل تەرگەلۋىن، ءتىپتى اۋىرلاتاتىن ءمان-جاي بولماسا، جازالارىن جەڭىلدەتۋ كەرەك دەگەن تالاپ قويۋدا.
ءبىز زاڭ بۇزۋشىلاردىڭ ەسىنە كونستيتۋتسيانىڭ 13 بابى بار ەكەنىن سالامىز. اركىمنىڭ ءوز قۇقىقتارى مەن بوستاندىقتارىنىڭ سوت ارقىلى قورعالۋىنا جانە بىلىكتى زاڭ كومەگىن تەگىن الۋعا قۇقىعى بار.
اركىمنىڭ ارەكەتىنە ءادىل باعا بەرۋ ءۇشىن، الدىمەن لاڭكەستەر مەن ەكسترەميستەردى، سودىرلار مەن قاراقشى-توناۋشىلاردى ءبىر بولەك، ال بەيبىت شەرۋگە شىعۋشىلاردى ءبىر بولەك قاراستىرۋ كەرەك. ءتۇرلى اقپاراتتارعا قاراساق، قازىر سودىر جەيتىن سوققىنى مومىن دا جەپ جاتىر... “اق جول» پارتياسى ءتۇسىپ جاتقان ارىزدارعا بايلانىستى وسىنداي تالاپپەن بۇعان دەيىن دە بىرنەشە رەت باس پروكۋراتۋراعا حات جازعان بولاتىن. سونىمەن بىرگە ارىزدار كوبەيگەندىكتەن، پرەزيدەنت جانىنداعى ادام قۇقى جونىندەگى ۋاكىلدىكتىڭ ارنايى توپتارىنا جەرگىلىكتى ءماسليحات دەپۋتاتتارىن قوسۋدى ۇسىندىق.
ايتا كەتۋ كەرەك، وسى ۋاكىلدىكتىڭ ازاپتاۋلاردىڭ الدىن الۋدىڭ ۇلتتىق تەتىگى قۇرامىن كەڭەيتۋ كەرەك. ويتكەنى، كەي وڭىرلەردە 4-5 ادامنان ارتپايدى. بۇلار ءار قالاداعى تۇتقىندا ۇستاۋ مەكەمەلەرىن ارالاسا، ءبىر ادامنان دا جەتپەيدى. «اق جول» پارتياسى وزدەرىنىڭ قوساتىن ادامدارىنىڭ ءتىزىمىن دايىنداپ قويدى.
ءبىز تەرگەۋدىڭ ءادىل ءارى اشىق ءوتۋىن تالاپ ەتەمىز!
ەرەۋىلدەن كەيىن ەلدە بولىپ جاتقان ادام قۇقىن اياققا تاپتاۋ ماسەلەلەرىنە مەملەكەتتىك حاتشى ەرلان قارين دە باسا نازار اۋدارىپ، بۇنى «ارانداتۋشىلىق» دەپ باعالاپ، قوعامدىق كوميسسيالار قۇرۋدى قولدادى.
قازىر بىرنەشە قوعامدىق كوميسسيالار قۇرىلىپ، الدى ىسكە كىرىسۋدە. ءيا، حالىقتىق باقىلاۋ عانا زاڭسىزدىقتىڭ جولىن كەسۋگە زور ۇلەس قوسادى.
“اق جولدىڭ” ۇسىنىستارى:
1.مەملەكەتتىك تونكەرىس جاساماق بولعاندار تولىق انىقتالىپ، جاۋاپقا تارتىلۋى قاجەت.
2. شابۋىل جاساعان بۇلىكشىلەر مەن بەيبىت شەرۋشىلەردى ەكى بولەك قاراستىرۋ كەرەك
3. تەرگەۋدى زاڭ جولىمەن ءادىل وتكىزۋ كەرەك: قاماۋداعىلاردى ازاپتاۋدى توقتاتىپ، ادۆوكاتتارعا جول اشىلۋى ءتيىس. جارالىلاردى اۋرۋحانالارعا جاتقىزۋ قاجەت.
4. ادام قۇقى مەن بوستاندىقتارى ساقتالىپ، تەرگەۋدىڭ ءادىل دە، اشىق ءوتۋىن تەكسەرۋ ءۇشىن ادام قۇقى جونىندەگى ۋاكىلدىگى جانىنان كوميسسيالار قۇرىپ، پارلامەنت پەن جەرگىلىكتى ءماسليحات دەپۋتاتتارىن، ساياسي پارتيالار مەن قوعامدىق ۇيىمدار وكىلدەرىن قوسۋ كەرەك.
5. حالىقتان تۇسەتىن اقپاراتتار بويىنشا ادام قۇقىقتارىن قورعاۋ جۇمىستارى ناتيجەلەرى اشىق جاريالانۋى ءتيىس.
6. مەملەكەتتىك توڭكەرىس جاساۋ ارەكەتى تولىق تەرگەلىپ بىتكەن سوڭ، ونىڭ ناتيجەسىن بۇكىل ەل ءبىلۋى ءۇشىن پارلامەنتتىك تىڭداۋ وتكىزۋ ءجون دەپ سانايمىز»،– دەلىنگەن ساۋالدا.
