Memlekettık töŋkerıs jasauşylardy bükıl el bıluı üşın Parlamenttık tyŋdau ötkızu kerek. Būl turaly «Aq jol» partiiasy mälımdedı, dep habarlaidy «Adyrna» tılşısı.
QR Parlamentı Mäjılısı deputaty, “Aq jol” fraksiiasy müşesı Qazybek İsa QR Bas prokurory Ǧ.Nūrdäuletovke jäne QR Prezidentı janyndaǧy Adam qūqyǧy jönındegı uäkıl E.Azimovaǧa deputattyq saual joldady.
«Talaidy körgen tarihymyzda 2022 jylǧy qaŋtardaǧy qandy qasıret bükıl elımızdı dür sılkındırdı. Memlekettık töŋkerıs jasamaq bolǧandar öz maqsattaryna jetuı üşın tıptı, eŋ qasiettı Täuelsızdıgımızdıŋ özın qūrban ete jazdady. Memleketımız saqtalyp qaldy, qūdaiǧa şükır, bıraq qanşama adamnyŋ qany tögıldı... Peiışte ruhtary şalqyp, İmandary salamat bolsyn. Basynda äleumettık ädılettılıkter sūrap, beibıt mitingıge şyqqan şeruşılerdı keiın Almatydan bastap, köptegen qalalarda arnaiy daiyndalǧan bülıkşıl toptar paidalanyp ketıp, zaŋdy şerudıŋ arty qandy şeruge ainaldy. Qaŋtardaǧy qyrǧynda 227 adam qaza tapty. Jalpy 4500-den astam adam zardap şegıp, 4353 adam türlı jaraqat alǧan. Mūndai qasiettı qazaq tarihyna qara taŋba salǧan qandy qasıret qaita qaitalanbauy üşın, Memlekettık töŋkerıstı jasamaq bolǧan kımder, basşysy kım, qosşysy kım, oryndauşylary kımder, bärı tolyq anyqtalyp, tügel jauapqa tartyluy tiıs! Ereuıl kezınde beibıt şeruge şyqqandary üşın ǧana köp adam, äsırese, jastarymyz jazyqsyz tūtqyndalyp, soqqyǧa jyǧylyp, azaptalyp jatqandary turaly naqty mälımetter men videolar kelude. Äleumettık jelılerde de jiı jazyluda. Tek qylmys jasaǧandar ǧana jauapqa tartyluy tiıs! Būndai jazyqsyz jandardy tūtqyndap, azaptau naǧyz arandatu, memleketke, Prezidenttıŋ saiasatyna qarsy qasaqana jasalyp jatqan qastandyq dep sanaimyz. Öitkenı, Prezident Qasym-Jomart Toqaev ärbır ıstıŋ ädıl tergeluın, tıptı auyrlatatyn män-jai bolmasa, jazalaryn jeŋıldetu kerek degen talap qoiuda. Bız zaŋ būzuşylardyŋ esıne Konstitusiianyŋ 13 baby bar ekenın salamyz. Ärkımnıŋ öz qūqyqtary men bostandyqtarynyŋ sot arqyly qorǧaluyna jäne bılıktı zaŋ kömegın tegın aluǧa qūqyǧy bar. Ärkımnıŋ äreketıne ädıl baǧa beru üşın, aldymen laŋkester men ekstremisterdı, sodyrlar men qaraqşy-tonauşylardy bır bölek, al beibıt şeruge şyǧuşylardy bır bölek qarastyru kerek. Türlı aqparattarǧa qarasaq, qazır sodyr jeitın soqqyny momyn da jep jatyr... “Aq jol» partiiasy tüsıp jatqan aryzdarǧa bailanysty osyndai talappen būǧan deiın de bırneşe ret Bas prokuraturaǧa hat jazǧan bolatyn. Sonymen bırge aryzdar köbeigendıkten, Prezident janyndaǧy Adam qūqy jönındegı uäkıldıktıŋ arnaiy toptaryna jergılıktı mäslihat deputattaryn qosudy ūsyndyq. Aita ketu kerek, osy uäkıldıktıŋ Azaptaulardyŋ aldyn aludyŋ ūlttyq tetıgı qūramyn keŋeitu kerek. Öitkenı, kei öŋırlerde 4-5 adamnan artpaidy. Būlar är qaladaǧy tūtqynda ūstau mekemelerın aralasa, bır adamnan da jetpeidı. «Aq jol» partiiasy özderınıŋ qosatyn adamdarynyŋ tızımın daiyndap qoidy. Bız tergeudıŋ ädıl ärı aşyq ötuın talap etemız! Ereuılden keiın elde bolyp jatqan adam qūqyn aiaqqa taptau mäselelerıne Memlekettık hatşy Erlan Qarin de basa nazar audaryp, būny «arandatuşylyq» dep baǧalap, qoǧamdyq komissiialar qūrudy qoldady. Qazır bırneşe qoǧamdyq komissiialar qūrylyp, aldy ıske kırısude. İä, halyqtyq baqylau ǧana zaŋsyzdyqtyŋ jolyn kesuge zor üles qosady. “Aq joldyŋ” ūsynystary: 1.Memlekettık tönkerıs jasamaq bolǧandar tolyq anyqtalyp, jauapqa tartyluy qajet. 2. Şabuyl jasaǧan bülıkşıler men beibıt şeruşılerdı ekı bölek qarastyru kerek 3. Tergeudı zaŋ jolymen ädıl ötkızu kerek: qamaudaǧylardy azaptaudy toqtatyp, advokattarǧa jol aşyluy tiıs. Jaralylardy auruhanalarǧa jatqyzu qajet. 4. Adam qūqy men bostandyqtary saqtalyp, tergeudıŋ ädıl de, aşyq ötuın tekseru üşın Adam qūqy jönındegı uäkıldıgı janynan komissiialar qūryp, parlament pen jergılıktı mäslihat deputattaryn, saiasi partiialar men qoǧamdyq ūiymdar ökılderın qosu kerek. 5. Halyqtan tüsetın aqparattar boiynşa adam qūqyqtaryn qorǧau jūmystary nätijelerı aşyq jariialanuy tiıs. 6. Memlekettık töŋkerıs jasau äreketı tolyq tergelıp bıtken soŋ, onyŋ nätijesın bükıl el bıluı üşın Parlamenttık tyŋdau ötkızu jön dep sanaimyz»,– delıngen saualda.
