جاعىمپاز جازۋشىلاردى تۇزەي المايسىڭ. ولاردىڭ تانىم-تالعامى بۇگىنگى داۋىرمەن ۇيلەسپەيدى. ال مەنىڭ ماقتاۋ مەن ماداققا قارسى يممۋنيتەتىم بار...
سونىمەن، توقاەۆتىڭ سۇحباتىن تىڭداپ شىقتىق. ەفيردىڭ ورىسشا وتكەنى كوڭىلگە كىربىڭ ءتۇسىردى دەمەسەڭىز، تۇتاستاي العاندا ءجۋرناليستىڭ سۇراق قويىسى ۇنادى. مۇنى مويىنداۋ كەرەك. كوپتىڭ كوكەيىندە جۇرگەن، قانى سورعالاعان ساۋالدار قويىلدى.
توقاەۆ تا جالتارعان جوق. نەگىزىنەن قازاقتىلدى اۋديتوريانى تولعاندىرىپ جۇرگەن ءبىرسىپىرا ساۋالعا بۇكپەسىز جاۋاپ قاتتى.
"نازارباەۆتىڭ قاتەلىگىن قايتالاماۋعا تىرىسامىن. ەكس-پرەزيدەنت ءۇشىن قاستەرلى سانالعان قۇندىلىقتار قازاقستاندى قۇزعا قۇلاتا جازدادى..".
پرەزيدەنتتىڭ بيلىككە قاتىستى پايىمدارىنىڭ وزەگىندە وسى مەسسەدج جاتقانداي سەزىلدى.
ۇلكەن كىسىنى ديپلوماتيانىڭ سالتىمەن، سىپايى شىعارىپ سالعانىن مەڭزەدى.
نە دەسەڭىزدەر دە، توقاەۆتىڭ جانى قازاق. قازاققا بۇيرەگى بۇرىپ تۇرادى.
"تاق اتامنان قالعان مۇرا ەمەس. بيلىكتە قالۋ ءۇشىن اتا زاڭدى بۇرمالايتىن استامشىلىققا بارمايمىن".
"ساياسات پەن ەكونوميكانى تەڭ الىپ ءجۇرۋ كەرەك. وزىمە بەرىلگەن مەرزىمدە پارلامەنتتىك جانە پارتيالىق جۇيەگە تولىق رەفورما جاساۋعا تىرىسامىن".
"نازارباەۆپەن ساۋدالاسقان جوقپىز. ەل باسىنا كۇن تۋعان شاقتا قاۋىپسىزدىك كەڭەسىنىڭ توراعالىعى پرەزيدەنت قولىندا بولۋى كەرەك دەگەن ماسەلەنى كولدەنەڭ قويدىم".
ءبىزدىڭ ساراڭ بايلار وزبەكتىڭ وليگارحتارىنان ۇلگى السىن. ەلدەن جىراقتا ءجۇرىپ بايىعان وزبەكتىڭ قالتالى قاۋىمى اتاجۇرتىنا كەلگەندە ايانىپ قالمايدى. ءوز ەسەبىنەن اۋرۋحانا تۇرعىزادى، ينفراقۇرىلىمدى جاڭارتادى. قازاقتىڭ ەسەبىنەن بايىعان ءبىزدىڭ وليگارحتار "شىق بەرمەس شىعايبايدىڭ" ءوزى".
"جاعىمپاز جازۋشىلاردى تۇزەي المايسىڭ. ولاردىڭ تانىم-تالعامى بۇگىنگى داۋىرمەن ۇيلەسپەيدى. ال مەنىڭ ماقتاۋ مەن ماداققا قارسى يممۋنيتەتىم بار".
"بىزدە كادرلىق دەفيتسيت بار. سول ءۇشىن دە ۇكىمەتتى تۇگەل اۋىستىرۋ مۇمكىن ەمەس. بولاشاقتا مىندەتتى تۇردە وزگەرىستەر بولادى".
توقاەۆ وسى تەزيسپەن-اق وتكەن 30 جىلدا ەكس-پرەزيدەنتتىڭ مەملەكەت مۇددەسىنە قايشى كەلەتىن قىرۋار قاتەلىك جىبەرگەنىن اڭعارتىپ وتىر. ول ءۇشىن نازارباەۆتى جەردەن الىپ، جەرگە سالۋ مىندەت ەمەس.
ءيا، توقاەۆتىڭ تەزيستەرى قازاقتىلدى اۋديتورياعا تاڭسىق ەمەس. قانشاما جىلدان بەرى قاقساپ ايتىپ كەلە جاتقان ماسەلەلەر. باستىسى نازارباەۆتىڭ تۇسىنداعى دوق، دورەكىلىك جوق. اتامىزدىڭ سۇحباتىنىڭ وزىنەن "جارگوننىي ستيل" سەزىلىپ تۇراتىن ەدى.
پرەزيدەنتتىڭ سوڭعى شەشىمدەرىنىڭ بارلىعى مەملەكەت مۇددەسى ءۇشىن جاسالعانى اڭعارىلادى.
نازارباەۆ ديناستياسى، ونىڭ سوڭىنداعى تارام-تارام كلاندار كەلمەسكە كەتتى دەپ تىلەيىك.
"نازارباەۆ مەنىڭ دوسىم، بىراق شىندىق قىمبات" دەگەن ۇستانىمنان تايماسا، ناعىز مەملەكەتشىلدىكتىڭ ۇلگىسى وسى بولادى. ءالى دە مەملەكەتتىڭ مۇددەسىنە باعىتتالعان شەشىمدەردى كۇتەمىز. ۋاقىت - تورەشى.
"ادىرنا" ۇلتتىق پورتالى
