Jaǵympaz jazýshylardy túzeı almaısyń. Olardyń tanym-talǵamy búgingi dáýirmen úılespeıdi. Al meniń maqtaý men madaqqa qarsy ımmýnıtetim bar...
Sonymen, Toqaevtyń suhbatyn tyńdap shyqtyq. Efırdiń oryssha ótkeni kóńilge kirbiń túsirdi demeseńiz, tutastaı alǵanda jýrnalıstiń suraq qoıysy unady. Muny moıyndaý kerek. Kóptiń kókeıinde júrgen, qany sorǵalaǵan saýaldar qoıyldy.
Toqaev ta jaltarǵan joq. Negizinen qazaqtildi aýdıtorııany tolǵandyryp júrgen birsypyra saýalǵa búkpesiz jaýap qatty.
"Nazarbaevtyń qateligin qaıtalamaýǵa tyrysamyn. Eks-prezıdent úshin qasterli sanalǵan qundylyqtar Qazaqstandy quzǵa qulata jazdady..".
Prezıdenttiń bılikke qatysty paıymdarynyń ózeginde osy messedj jatqandaı sezildi.
Úlken kisini dıplomatııanyń saltymen, sypaıy shyǵaryp salǵanyn meńzedi.
Ne deseńizder de, Toqaevtyń jany qazaq. Qazaqqa búıregi buryp turady.
"Taq atamnan qalǵan mura emes. Bılikte qalý úshin Ata zańdy burmalaıtyn astamshylyqqa barmaımyn".
"Saıasat pen ekonomıkany teń alyp júrý kerek. Ózime berilgen merzimde parlamenttik jáne partııalyq júıege tolyq reforma jasaýǵa tyrysamyn".
"Nazarbaevpen saýdalasqan joqpyz. El basyna kún týǵan shaqta Qaýipsizdik keńesiniń tóraǵalyǵy prezıdent qolynda bolýy kerek degen máseleni kóldeneń qoıdym".
Bizdiń sarań baılar ózbektiń olıgarhtarynan úlgi alsyn. Elden jyraqta júrip baıyǵan ózbektiń qaltaly qaýymy atajurtyna kelgende aıanyp qalmaıdy. Óz esebinen aýrýhana turǵyzady, ınfraqurylymdy jańartady. Qazaqtyń esebinen baıyǵan bizdiń olıgarhtar "shyq bermes Shyǵaıbaıdyń" ózi".
"Jaǵympaz jazýshylardy túzeı almaısyń. Olardyń tanym-talǵamy búgingi dáýirmen úılespeıdi. Al meniń maqtaý men madaqqa qarsy ımmýnıtetim bar".
"Bizde kadrlyq defııt bar. Sol úshin de Úkimetti túgel aýystyrý múmkin emes. Bolashaqta mindetti túrde ózgerister bolady".
Toqaev osy tezıspen-aq ótken 30 jylda eks-prezıdenttiń memleket múddesine qaıshy keletin qyrýar qatelik jibergenin ańǵartyp otyr. Ol úshin Nazarbaevty jerden alyp, jerge salý mindet emes.
Iá, Toqaevtyń tezısteri qazaqtildi aýdıtorııaǵa tańsyq emes. Qanshama jyldan beri qaqsap aıtyp kele jatqan máseleler. Bastysy Nazarbaevtyń tusyndaǵy doq, dórekilik joq. Atamyzdyń suhbatynyń ózinen "jargonnyı stıl" sezilip turatyn edi.
Prezıdenttiń sońǵy sheshimderiniń barlyǵy memleket múddesi úshin jasalǵany ańǵarylady.
Nazarbaev dınastııasy, onyń sońyndaǵy taram-taram klandar kelmeske ketti dep tileıik.
"Nazarbaev meniń dosym, biraq shyndyq qymbat" degen ustanymnan taımasa, naǵyz memleketshildiktiń úlgisi osy bolady. Áli de memlekettiń múddesine baǵyttalǵan sheshimderdi kútemiz. Ýaqyt - tóreshi.
"Adyrna" ulttyq portaly
