قۇرمەتتى پرەزيدەنت! قاسىم-جومارت كەمەلۇلى!
راسىندا… جاعىمپازدىقتى جانىڭىز سۇيمەيتىنىن بىلەم، وزىڭىزگە جاعىنۋ ءۇشىن ەمەس، سىزگە جانىم اشىعاننان وسى جازبامدى جازىپ وتىرمىن! وتىز جىل بويعى ماداق پەن ودا ايتقانداردىڭ كەسىرى سىزگە كەپ تيمەسىنشى! “قاندى قاڭتار” وقيعاسى قارا حالىققا وڭاي تيگەن جوق!
جۇرەك پەن جۇيكەگە قاتتى سوققى بولدى. حالىق ءالى دە ەس جيا الماي، ەسەڭگىرەپ وتىرعانى دا جاسىرىن ەمەس! قايعىدان قان جۇتىپ وتىرعان حالىق وسى كەزدە وزىڭىزدەن ءبىر اۋىز جىلۋ ءسوز كۇتتى… تەك وزىڭىزگە جالتاقتاپ، وزىڭىزگە عانا ءۇمىت ارتىپ وتىرعان ءوز ۇلتىڭىزدى ءبىرىنشى جۇباتىپ الىپ، سوسىن عانا الەمگە جەتى تىلدە سۇقبات بەرسەڭىز دە جاراسار ەدى…
سەنىمنىڭ سوڭعى جۇگىن وزىڭىزگە ارتقان مىناۋ قاراشا حالىق وكپەلەمەس تە ەدى! ءيا، ءبۇتىن ءبىر مەملەكەتتى جانە ونىڭ مۇددەسىن ساقتاپ قالۋ ءۇشىن جاساعان ءاربىر ءىسىڭىز، ۇتىمدى شەشىمىڭىز - حالىقتىڭ قولداۋىن تاۋىپ، اق باتاسىن ارقالار ەدىڭىز… الەمنىڭ تىلىندە بەرگەن مىنا سۇقباتىڭىز مىڭ جەردەن دۇرىس ءارى كەرەمەت بولعانىمەن، ەتەگى جاسقا تولىپ جۇبانىش ىزدەپ وتىرعان حالىقتى، ودان سايىن تەپكىلەپ توبەلەگەنمەن تەڭ بولدى!
مويىنداۋ كەرەك، ءبىز ونسىزدا وتىز جىل بويى رۋحاني “بوداندىقتا” بولدىق! الەمگە جاعۋ ءۇشىن الەمنىڭ تىلىندە سايراپ، الەم ءبىزدى مويىنداۋ ءۇشىن بارىمىزدى… ءيا، بار بايلىعىمىزدى بەرىپ كەلدىك ەمەس پە؟! ناتيجەسىندە، ءوز ۇلتىڭىز اش-جالاڭاش ايانىشتى كۇيدە ءوز تىلىندە نان سۇراپ كوشەگە شىقتى! حالقىڭىز تويىپ وتىرسا، الاڭعا شىعىپ نەسى بار؟
الاڭعا تەك تەرروريستەر ەمەس، ەڭ ءبىرىنشى قولىنا جالاۋ ۇستاعان بەيبىت حالىق شىقتى! دۇشپاندارعا اتىلعان وقتان قاسكويلەر عانا ەمەس، بەيبىت حالىق تا شەيىت بولدى! بىراق، مەملەكەتكە قاستاندىقتى قارا حالىق ەمەس، قولىنا “بيلىك” بەرىلىپ ءارى سەنىم ارتىلعان ۇقك توراعاسى جاساپ وتىر ەمەس پە؟! “پروۆوسلاۆتاردىڭ مولاسىن تالقانداعانداردى تاۋىپ جازالاڭدار”، دەپسىز!
ال قاڭعىعان وقتان قازا بولعان جازىقسىز جانداردىڭ وتباسىنا كوڭىل ءبولىپ، قايعىسىنا ورتاقتاسۋعا بولمادى ما؟! ولگەندەر سويلەمەيدى… بىراق، سول ولىكتەردى قازۋدى توقتاتىڭدار دەپ ايتۋعا بولمادى ما؟! سوندا… ءوز قازاعىڭىزدان سول پروۆوسلاۆتار ارتىق بولدى ما؟! بۇل ءبولىنۋ ەمەس، بارىنە تەڭ قاراساڭىز بولماس پا ەدى؟! سان ساۋال…! وكىنىش كوپ… وزەگىم ورتەنىپ بارادى!
قۇرمەتتى پرەزيدەنتىم، قوعامدا بولىپ جاتقان قازىرگى جايتتاردى كوزبەن كورىپ وتىرىپ، ء“بارى دۇرىس بولدى” دەپ جالعان سويلەۋگە مەنىڭ ارىم دا، داتىم دا بارمادى! قازاقستان ءۇشىن، حالىق ءۇشىن ەسەلەي ەتكەن ەرەن ەڭبەگىڭىز ەلەنبەي، ءسىز “قۇرمەتسىز” بولىپ قالا ما دەپ قورقام! حالىقتىڭ نالاسىنان قورقام!
الەمدى ەمەس، ەڭ الدىمەن وزىڭىزگە جاۋتەڭدەپ قاراپ وتىرعان حالقىڭىزدىڭ باسىن سيپاڭىزشى! بۇل مەملەكەت تەك 162 وليگارحتان تۇرمايدى! وزىڭىزگە عانا ءۇمىت ارتىپ، سەنىممەن قاراپ وتىرعان ميلليونداعان قارا حالىق بار! قارا حالىقتىڭ ءتىلى، ءدىلى تەك - قازاق تىلىندە! جۇرەگى دە، قانى دا، نامىسى دا - قازاق دەپ سوعادى…
“قاندى قاڭتار” وقيعاسى وزىمە دە اۋىر ءتيىپ، وزىڭىزدەن جۇبانىش پەن جىلۋ ءسوز كۇتكەندەردىڭ ءبىرى ءوزىم ەدىم! الەمگە بەرگەن سۇقباتىڭىزدى كورىپ وتىرىپ، ءۇنسىز قالا المادىم! بۇل جازبامدى جانىڭىزداعى “كەيبىر جاعىمپازدار” دۇرىس جەتكىزبەۋى دە مۇمكىن! ءتىپتى “ويباي سىزگە قارسى شىعىپ جاتىر” دەپ قۋدالاۋى دا مۇمكىن! ءبارى دە مۇمكىن! بىراق… حانعا دا دات ايتىلعان ! مەملەكەت پەن ۇلتقا دەگەن نيەتىم ارقاشان - ءتۇزۋ، قۇرمەتىم - شەكسىز! پرەزيدەنت ءارى ۇلت كوشباسشىسى رەتىندە ءسىزدىڭ حالىق ءۇشىن جاساعان ءارى جاساپ جاتقان ءاربىر ءىسىڭىزدى قولدايمىن! قۇرمەت تۇتام! سەنىمىم… ءالى دە ارتار ءۇمىتىم كوپ!
"ادىرنا" ۇلتتىق پورتالى
