پرەزيدەنت قاسىم-جومارت توقاەۆ سىبايلاس جەمقورلىقپەن كۇرەستە باسىمدىق بەرۋ قاجەت سالالاردى اتادى، سونداي-اق قۇزىرلى ورگان باسشىلارىنىڭ جۇمىسى جەمقورلىقپەن كۇرەس كورسەتكىشى ارقىلى دا باعالاناتىنىن جەتكىزدى.
بۇل تۋرالى پرەزيدەنت سىبايلاس جەمقورلىققا قارسى ءىس-قيمىل ماسەلەلەرى جونىندەگى كەڭەستە ايتتى، دەپ حابارلادى اقوردا.
"كەدەن، قۇرىلىس، ءبىلىم بەرۋ جانە دەنساۋلىق ساقتاۋ سالالارىنداعى جەمقورلىقپەن كۇرەسۋگە باسا ءمان بەرۋ كەرەك. جاۋاپتى مينيسترلىكتەر وسى باعىتتار بويىنشا جەمقورلىقتى جۇيەلى نەگىزدە جويۋ جونىندە جوسپار ازىرلەۋى قاجەت. بۇل جوسپاردى ءبىرىنشى توقساننىڭ قورىتىندىسى بويىنشا مۇقيات پىسىقتاپ، ۇسىنۋدى تاپسىرامىن. بارلىق ءىس-شارانى سىبايلاس جەمقورلىققا قارسى ءىس-قيمىل اگەنتتىگىمەن كەلىسۋ قاجەت. قۇزىرلى ورگاندارداعى ءبىرىنشى باسشىلاردىڭ جۇمىسىن جەمقورلىقپەن كۇرەس كورسەتكىشى ارقىلى دا باعالايتىن بولامىن", - دەدى قاسىم-جومارت توقاەۆ.
پرەزيدەنت سىبايلاس جەمقورلىققا قارسى ءىس-قيمىلدىڭ بارلىق باعىتىن تۇبەگەيلى قايتا قاراۋعا شاقىردى. سونداي-اق كاسىپكەرلەر مەن جۇرتشىلىقتىڭ سىبايلاس جەمقورلىق دەرەكتەرى بويىنشا بەرگەن وتىنىشتەرى نەگىزىندە جۇيەلى جۇمىس جۇرگىزۋ قاجەت.
توقاەۆ مەملەكەت بەلگىلەيتىن باعالاردى رەتتەۋ كەزىندەگى جەمقورلىقتى تۇبەگەيلى جويۋ ماسەلەسىنە دە ەرەكشە نازار اۋداردى.
ء"تيىستى ۋاكىلەتتى ورگاندار باعانى بەلگىلەگەن كەزدە ونىڭ قانشالىقتى نەگىزدى ەكەنىن مۇقيات قاراۋى كەرەك. مۇنىڭ استارىندا ەكونوميكالىق سەبەپتەن بولەك، بىرەۋدىڭ جىمىسقى ارەكەتى جاتقان جوق پا دەگەن ساۋال تۋىندايدى. مىسالى، وتاندىق ءونىم وندىرۋشىلەر تەمىرجول سالاسىن جەمقورلىق جايلاعانىن ايتىپ، ۇنەمى شاعىمدانادى. كاسىپكەرلەر ناقتى ءبىر نىسانعا اپاراتىن تەمىرجولدى پايدالانعانى ءۇشىن تولەيتىن اقىنىڭ كولەمىنە بايلانىستى نارازىلىق بىلدىرۋدە. وسىعان وراي، ءبىر ۋاقىتتا بىرنەشە وڭىردەن – قوستاناي، شىعىس قازاقستان، تۇركىستان، اقمولا جانە پاۆلودار وبلىستارىنان ارىز تۇسكەن. مونوپوليست كومپانيالار باعانى ءوز بەتىمەن ەسەلەپ وسىرگەن", - دەدى مەملەكەت باسشىسى.
ايتۋىنشا، وسىنداي ارەكەتتەر حالىق تۇتىناتىن تاۋارلاردىڭ باعاسىنا بىردەن اسەر ەتەدى.
”ادىرنا” ۇلتتىق پورتالى
