Prezident Qasym-Jomart Toqaev sybailas jemqorlyqpen küreste basymdyq beru qajet salalardy atady, sondai-aq qūzyrly organ basşylarynyŋ jūmysy jemqorlyqpen küres körsetkışı arqyly da baǧalanatynyn jetkızdı.
Būl turaly prezident sybailas jemqorlyqqa qarsy ıs-qimyl mäselelerı jönındegı keŋeste aitty, dep habarlady Aqorda.
"Keden, qūrylys, bılım beru jäne densaulyq saqtau salalaryndaǧy jemqorlyqpen küresuge basa män beru kerek. Jauapty ministrlıkter osy baǧyttar boiynşa jemqorlyqty jüielı negızde joiu jönınde jospar äzırleuı qajet. Būl jospardy bırınşı toqsannyŋ qorytyndysy boiynşa mūqiiat pysyqtap, ūsynudy tapsyramyn. Barlyq ıs-şarany Sybailas jemqorlyqqa qarsy ıs-qimyl agenttıgımen kelısu qajet. Qūzyrly organdardaǧy bırınşı basşylardyŋ jūmysyn jemqorlyqpen küres körsetkışı arqyly da baǧalaityn bolamyn", - dedı Qasym-Jomart Toqaev.
Prezident sybailas jemqorlyqqa qarsy ıs-qimyldyŋ barlyq baǧytyn tübegeilı qaita qarauǧa şaqyrdy. Sondai-aq käsıpkerler men jūrtşylyqtyŋ sybailas jemqorlyq derekterı boiynşa bergen ötınışterı negızınde jüielı jūmys jürgızu qajet.
Toqaev memleket belgıleitın baǧalardy retteu kezındegı jemqorlyqty tübegeilı joiu mäselesıne de erekşe nazar audardy.
"Tiıstı uäkılettı organdar baǧany belgılegen kezde onyŋ qanşalyqty negızdı ekenın mūqiiat qarauy kerek. Mūnyŋ astarynda ekonomikalyq sebepten bölek, bıreudıŋ jymysqy äreketı jatqan joq pa degen saual tuyndaidy. Mysaly, otandyq önım öndıruşıler temırjol salasyn jemqorlyq jailaǧanyn aityp, ünemı şaǧymdanady. Käsıpkerler naqty bır nysanǧa aparatyn temırjoldy paidalanǧany üşın töleitın aqynyŋ kölemıne bailanysty narazylyq bıldırude. Osyǧan orai, bır uaqytta bırneşe öŋırden – Qostanai, Şyǧys Qazaqstan, Türkıstan, Aqmola jäne Pavlodar oblystarynan aryz tüsken. Monopolist kompaniialar baǧany öz betımen eselep ösırgen", - dedı memleket basşysy.
Aituynşa, osyndai äreketter halyq tūtynatyn tauarlardyŋ baǧasyna bırden äser etedı.
”Adyrna” ūlttyq portaly
