قازاقستاندا 2022 جىلى كۇزەتشىلەرگە، بۋحگالتەرلەرگە، ساتۋشىلار مەن جۇرگىزۋشىلەرگە دەگەن سۇرانىس ساقتالادى، دەپ حابارلايدى "ادىرنا" ۇلتتىق پورتالى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
«ەڭبەك رەسۋرستارىن دامىتۋ ورتالىعى» اق (بۇدان ءارى – ەردو) بولجامداۋ دەپارتامەنتىنىڭ دەرەكتەرى بويىنشا قازاقستاندا اعىمداعى جىلى جالدامالى جۇمىسكەرلەردىڭ سانى 6,8-6,9 ملن ادامدى قۇرايدى. جالدامالى جۇمىسكەرلەرگە سۇرانىس 188,6 مىڭ ادامدى قۇرايدى، ونىڭ جارتىسى جۇمىستان شىعاتىن جالدامالى جۇمىسكەرلەردى الماستىرۋ سۇرانىسىنا ساي كەلەدى. سونىمەن قاتار، كۇزەتشىلەر، بۋحگالتەرلەر، ساتۋشىلار مەن جۇرگىزۋشىلەر ەڭبەك نارىعىندا ەڭ تانىمال بولىپ جانە جاپپاي سۇرانىستا قالا بەرەدى.
«وڭىرلەر بويىنشا نەعۇرلىم ەلەۋلى جيىنتىق سۇرانىس، جۇمىستان شىعاتىن جالدامالى جۇمىسكەرلەردى الماستىرۋ بويىنشا سۇرانىستى قوسا العاندا، الماتى قالاسىندا، سونداي-اق الماتى جانە جامبىل وبلىستارىندا ورىن الاتىن بولادى. ال سالالار بويىنشا ءبىلىم بەرۋ، اۋىل شارۋاشىلىعى جانە ساۋدا باعىتتارىنىڭ قىزمەتكەرلەرى كوبىرەك تالاپ ەتىلەدى»، – دەدى ەردو بولجامداۋ دەپارتامەنتىنىڭ ديرەكتورى دميتري شۋمەكوۆ.
ساراپشىلاردىڭ ايتۋىنشا، ايەلدەردىڭ زەينەتكەرلىك جاسىن ارتتىرۋدى ەسكەرە وتىرىپ، جالپى ەڭبەككە قابىلەتتى جاستاعى حالىق سانى اعىمداعى جىلى 11,4 ملن ادامعا جەتەدى (2021 جىلعى دەڭگەيمەن سالىستىرعاندا 98 مىڭعا وسەدى).
«اعىمداعى جىلى جۇمىس كۇشىنىڭ سانى 9,2-9,3 ملن ادامدى قۇرايدى، ياعني جالپى وتكەن جىلدىڭ دەڭگەيىندە ساقتالادى. الايدا، ءبىزدىڭ بولجامىمىز بويىنشا، ەلىمىزدىڭ ءۇش ءىرى قالاسىندا ەكونوميكالىق بەلسەندى حالىقتىڭ جيىنتىق سانى وسى قالالارداعى جاستار ۇلەسىنىڭ ارتۋى سالدارىنان جانە كوشى-قون سەبەپتەرى بويىنشا 54 مىڭ ادامعا وسەدى»، – دەپ ءبولىستى دميتري شۋمەكوۆ.
سونداي-اق، بولجامدارعا سايكەس، جۇمىسسىزدار سانى 461-465 مىڭ ادام دەڭگەيىندە بولادى، ال جۇمىسسىزدىق دەڭگەيى 5% - دان اسپايدى.
ءبىلىم بەرۋ جۇيەسى تاراپىنان ورتا مەكتەپتى شامامەن 261 مىڭ ادام بىتىرەدى نەمەسە تاستاپ كەتۋى مۇمكىن دەپ كۇتىلۋدە، ونىڭ ىشىندە 109 مىڭ ادام – توعىزىنشى سىنىپتان كەيىن، ال 152 مىڭ ادام – 11 (12) سىنىپتان كەيىن شىعىپ كەتۋى ىقتيمال. كوللەدجدەرگە وسى ساننان 131 مىڭعا جۋىق ادام، جوعارى وقۋ ورىندارىنا 103 مىڭ ادام بارادى. قالعان بۇرىنعى وقۋشىلار قاتارىنان ازاماتتار قازاقستاننان تىس جەرلەرگە شىعادى (~10 مىڭ ادام) نەمەسە ەڭبەك نارىعىنا شىعادى (~17 مىڭ ادام).
اعىمداعى جىلى تجكب-نى شامامەن 145 مىڭ ادام تابىستى اياقتايدى دەپ كۇتىلۋدە، ونىڭ ىشىندە 90 مىڭى – نەگىزگى ورتا ءبىلىم بازاسىندا جانە 49 مىڭى –جالپى ورتا ءبىلىم بازاسىندا، ونىڭ ىشىندە شامامەن 16,4 مىڭ ادام جوعارى ءبىلىم بەرۋ ۇيىمدارىندا وقۋىن جالعاستىرادى. بۇدان باسقا، جوعارى وقۋ ورىندارىنان جوعارى ءبىلىمى بار 163,5 مىڭ ادام جانە جوعارى وقۋ ورنىنان كەيىنگى ءبىلىمى بار 20 مىڭعا جۋىق ادام شىعارىلاتىن بولادى.
جالپى العاندا، ءبىلىم بەرۋ دەڭگەيلەرى اراسىنداعى كۇردەلى اۋىسۋلاردى ەسكەرە وتىرىپ، ەڭبەك نارىعىنا شامامەن 295 مىڭ جۇمىسكەر شىعادى دەپ كۇتىلۋدە. بازالىق ستسەناري كەزىندە جالدامالى جۇمىسشىلارعا قاجەتتىلىك، بۇرىن ايتىلعانداي، 188,6 مىڭ ادامدى قۇرايدى. تيىسىنشە، قالعان 106 مىڭ ادام جەكە نەمەسە وبەكتيۆتى سەبەپتەر بويىنشا ءوزىن-ءوزى جۇمىسپەن قامتۋعا، ونىڭ ىشىندە جەكە كاسىپكەرلەر مارتەبەسىنە كوشۋى مۇمكىن.
"ادىرنا" ۇلتتىق پورتالى
