ەرمەك نارىمبايدى اۋەجايدان كۇتىپ الۋعا بارعان 50-گە جۋىق ادام، ءبىر ساعاتتان استام تۇرىپ، قايتتى. ولار اۋەجايدىڭ كۇتۋ زالىندا ەرمەك نارىمبايعا بوستاندىق تالاپ ەتىپ ۇرانداتتى.
ەرمەك نارىمباي قازاقستانعا ورالاتىنىن تاياۋدا، قاڭتاردىڭ 23-ىنە الەۋمەتتىك جەلى ارقىلى حابارلاعان. "جاقىندا الماتىدا بولامىن. بيلىكپەن پەن قوعام اراسىندا ديالوگ بولادى دەپ سەنەمىن، اق تۋ ۇستاپ بارامىن. بالالارىممەن كەزدەسۋگە مۇمكىندىك بولا ما، جوق پا، بىلمەيمىن" دەپ جازعان.
كەشە، اقپاننىڭ 5-ءى كۇنى كيەۆتەن الماتىعا ۇشار الدىندا دا الەۋمەتتىك جەلىدەگى پاراقشاسى ارقىلى تىكەلەي ەفيرگە شىعىپ، بىرنەشە مينۋتتان سوڭ ۇشاققا وتىراتىنىن حابارلاعان.
51 جاستاعى ەرمەك نارىمباي قازاقستاندا تۇتقىندالۋى مۇمكىن ەكەنىن جوققا شىعارمايدى، بىراق ءدال قازىر ءوزىن قاماۋ بيلىككە ءتيىمسىز دەپ سانايدى.
"اقوردا قازاقستانعا ءوز ەركىممەن كەلە جاتقان مەنى اباقتىعا وتىرعىزۋ پايداسىز ەكەنىن، بەدەلىنە زور نۇقسان كەلەتىنىن تۇسىنۋگە ءتيىس" دەيدى ول.
ول اباقتىعا قامالعان كۇننىڭ وزىندە "ۇزاق وتىرمايتىنىنا" سەنىمدى.
"ەگەر [تۇرمەگە] وتىرعىزاتىن بولسا، ول ۇزاققا سوزىلمايدى دەپ سەنەمىن. قازاقستانعا مەنى شىعارىپ سالىپ، سوندا قارسى الاتىن جۋرناليستەر، بلوگەرلەر، كوپ ادام بولادى، سوندىقتان مەنى تىنىش قانا تۇتقىنداي المايدى. ۇرىپ-سوعۋ مەن ازاپتاۋعا دا تولىق دايىنمىن، بىراق ول بيلىككە ءتيىمسىز. مەنىڭ داۋسىم سىرت جاقتان گورى، اسىرەسە ءدال قازىر ەلدىڭ ىشىندە سالماقتىراق بولادى» دەپ جازعان ەرمەك نارىمباي. ول حالىققا ۇندەۋىن "تۇرمەدە وتىرىپ تا جازاتىنىن" ايتادى.
2015 جىلعى قازاندا قازاقستان سوتى ازاماتتىق بەلسەندىلەر ەرمەك نارىمباي مەن سەرىكجان مامبەتاليندى مۇرات تەلىبەكوۆتىڭ "ۆەتەر س ۋليتسى" كىتابىنىڭ ءۇزىندىسىن الەۋمەتتىك جەلىگە جاريالاعانى ءۇشىن سوتتاعان. "الاۋىزدىق تۋدىردى" دەگەن ايىپ تاعىلعان نارىمباي ءۇش جىلعا، مامبەتالين ەكى جىلعا بوستاندىعىنان ايىرىلعان.
قازاقستاندىق قۇقىق قورعاۋشىلار قاماۋداعى نارىمباي مەن مامبەتاليندى "ساياسي تۇتقىندار" تىزىمىنە ەنگىزگەن. كەيىن ەكەۋى دە ىسىنە "وكىنەتىنى" جايلى حات جاريالادى. نارىمباي تەرگەۋ اباقتىسىندا ءبىر ايدان استام ۋاقىت اشتىق جاريالاپ جاتتى، 2016 جىلعى 22 اقپاندا سوت ونى ۇي قاماعىنا اۋىستىرعان سوڭ بەلسەندى اشتىعىن توقتاتتى. كەيىن اپەللياتسيا سوتى ونىڭ جازاسىن جەڭىلدەتىپ، ەركىندىگىن ءۇش جىلعا شەكتەۋگە الماستىرعان. 2016 جىلعى شىلدەدە ەرمەك نارىمباي قازاقستاننان بيلىكتىڭ رۇقساتىنسىز ۋكرايناعا كەتىپ قالدى.
ەستەرىڭىزگە سالا كەتەيىك، ەرمەك نارىمباي 2010 جىلعى 1 مامىردا الماتىدا سول كەزدەگى قازاقستان پرەزيدەنتى نۇرسۇلتان نازارباەۆتىڭ وتستاۆكاعا كەتۋىن تالاپ ەتكەن دەموكراتيالىق كۇشتەر جيىنىندا "نازارباەۆ، كەت!" دەپ ۇرانداعان. سول كۇنى كەشكە ونى پوليتسيا ۇستاپ اكەتىپ، ء"تارتىپ بۇزدى" دەگەن ايىپپەن 15 تاۋلىككە قاماعان. كەيىن قاماۋدا وتىرعان بەلسەندىگە "سوتقا قۇرمەت كورسەتپەدى" جانە "پوليتسەيلەرگە قارسىلاسىپ، كۇش كورسەتتى" دەگەن ايىپتار تاعىلدى. الماتىنىڭ بوستاندىق اۋداندىق سوتى وسى ەكى ايىپ بويىنشا 2010 جىلعى 26 ماۋسىمدا ەرمەك نارىمبايدى ءتورت جىلعا بوستاندىعىنان ايىردى. 2012 جىلعى 25 اقپاندا بيلىك راقىمشىلىق جاساپ ونى قاماۋدان بوساتقان.
"ادىرنا" ۇلتتىق پورتالى
