مەملەكەتتىك حاتشى ەرلان قارين قاڭتار وقيعاسىنا قاتىستى Qazaqstan ۇلتتىق تەلەارناسىنا بەرگەن سۇحباتىندا ءدىني راديكاليزمنىڭ، ساياسي راديكاليزمنىڭ بەلگىلەرى قايدان پايدا بولعانىنا جەتە توقتالدى. سونىمەن قاتار "قاسىرەتتى قاڭتار" وقيعاسىنا قاتىستى پىكىر ءبىلدىرىپ، جاستاردى تۋرا جولدان اداستىراتىن كريمينالدى تۇلعالاردىڭ از ەمەستىگىن دە اتاپ ءوتتى، دەپ حابارلايدى "ادىرنا" ۇلتتىق پورتالى.
- مىنا كوشەدەگى كەشەگى بولعان جاعدايلار بىزگە ۇلكەن ءبىر وي سالۋى كەرەك! قولىنا قارۋ الىپ، ءبىر ازاماتتىڭ ەكىنشى ازاماتقا وسىلاي قارۋ قولدانۋى قاشان بولعان جاعداي؟! بۇل راديكاليزمنىڭ سەبەبى نەدە؟ ءبىز وسى ۋاقىتقا دەيىن ءدىني راديكاليزم دەپ كەلدىك، بىزدە ءدىني راديكاليزم ەمەس، ساياسي راديكاليزم، ساياسي ەكسترەميزمنىڭ دە بەلگىلەرى پايدا بولدى. بۇعان دەر كەزىندە قازىر توسقاۋىل كەرەك. كەشەگى كوشەدە جاعدايلاردىڭ بارلىعىنا ۇستەمدىك ەتىپ، ۇران سالىپ، ادامداردى سوڭىنان ەرتىپ وتىرعان كريمينالدى تۇلعالار بولدى. قاي زاماننان، قاي كەزدەن باستاپ بىزدە قوعامدا جاستارعا كريمينالدى تۇلعالار كوسەم بولىپ كەتتى؟ نەلىكتەن ءبىزدىڭ جاستار سول ينستاگرام مەن تيك-توكتا سول ازاماتتاردى ەلىكتەيتىن تۇلعا رەتىندە كورىپ وتىر؟! راس قوي. ءبىز وسىنىڭ بارلىعىن كورىپ تە كەلدىك، ايتىپ تا كەلدىك. بىراق، ەندى وسىنى ايتۋ، جازۋ جەتكىلىكسىز شىعار. ءبىزدىڭ تاراپىمىزدان بەلگىلى ءبىر قادامدار كەرەك شىعار. ءبىزدىڭ جاستارىمىزعا مۇمكىن باسقا ەلىكتەيتىن تۇلعالار بولۋى كەرەك. ءبىزدىڭ وسىلاي تەلەديدار الدىندا سۇحبات قۇرىپ وتىرعانىمىز قانداي پايدا؟! ەگەر دە، جاستارىمىز وزدەرىنە جالعان كوسەمدەردى تاۋىپ الىپ، سولاردىڭ سوزدەرىنە ەرىپ وتىراتىن بولسا؟!، - دەپ پىكىر ءبىلدىردى ەرلان قارين.
"ادىرنا" ۇلتتىق پورتالى
