قاڭتار ايىنداعى قايعىلى وقيعالاردان كەيىن الەۋمەتتىك جەلىلەردە تارتىپسىزدىكتەر مەن توناۋ فاكتىلەرىن، سونداي-اق تەرروريزم مەن مەملەكەتتىك توڭكەرىس قيمىلدارىن تەرىسكە شىعارۋ ارەكەتى بايقالا باستادى. ەل ازاماتتارىنىڭ قوعامدىق ساناسىن باقىلاۋعا الۋ ءۇشىن اقپاراتتىق كۇرەس جۇرگىزۋگە تۋرا كەلدى. جاعدايدىڭ ۋشىعىپ كەتكەنى سونشالىق، توناۋ ارەكەتىن دۇرىسقا شىعارىپ، جاقتاعاندار دا تابىلىپ جاتتى. ءتىپتى، كوپ ادامنىڭ بولمىسىنان ۇيات ۇعىمى كەمىگەندەي كورىندى.
تەرىس پيعىلدىلار بەيبىت شەرۋگە شىققان حالىقتى ارانداتىپ، ارتى قانتوگىس قىرعىنعا ۇلاستى. جازىقسىز جاندار جاپا شەكتى.
«باستاپقى كەزدە، مەن ايتىپ وتكەندەي، بەيبىت نارازىلىق بولدى. كەيىن الماتى قالاسىندا ساياسي ميتينگ وتكىزىلدى. سودان سوڭ شيبورىدەي قاپتاعان قارۋلى سودىرلار قالاعا ءۇش باعىتتان باس سالدى. باسىندا ولار وزدەرىن بەيبىت دەمونسترانتتار رەتىندە كورسەتىپ، قۇقىقتىق ءتارتىپتى ساقتاۋشى كۇشتەردى، ءتىپتى قالا تۇرعىندارىن شاتاستىردى. ال سودان كەيىن «الماتى تراگەدياسى» دەگەن اتاۋ الىپ، تاريحقا ەنەتىن وقيعا بولدى»، - دەدى قاسىم-جومارت توقاەۆ.
بۇگىندە بۇلعاقتان حالىق تا، بيلىك تە ەس جيىپ ۇلگەرە قويعان جوق.
بەيبىت شەرۋدىڭ شىرقى بۇزىلعان ءسات جانە جاپپاي تارتىپسىزدىكتەر
سيپاتى وزگەرگەن شەرۋ: بەيبىت شەرۋدى پايدالانعان سودىرلار توبى بۇلىك شىعارىپ، جاعداي كۇردەلەنە ءتۇستى. قىزمەتتىك كولىكتەردى ورتەپ، مۇلىكتەردى ۇرلاي باستادى. ستراتەگيالىق ماڭىزدى نىسانداردى باسىپ الۋعا تالپىنىپ، بەيبىت تۇرعىندار مەن پوليتسيا قىزمەتكەرلەرىن ايامادى. ال الەۋمەتتىك جاعدايدىڭ دۇرىستالۋىن تالاپ ەتكەن بەيبىت شەرۋشىلەردىڭ قالانىڭ بۇلاي تاس-تالقانىن شىعارمايتىنى بەسەنەدەن بەلگىلى بولاتىن.
توناۋ: «ءاي دەيتىن اجە، قوي دەيتىن قوجا جوق»
دۇربەلەڭدى پايدالانعان بۇلىكشىلەر مەن ۇرى-قارىلار يەسىز قالعان دۇكەندەر مەن بانكوماتتارعا شابۋىل جاسادى. ىقتيمال قىلمىسكەرلەر قارۋ-جاراق دۇكەنىن توناپ، ازاماتتىق سوعىس جولىنا ءتۇستى. قارا جانە قىزىل كۇرتەشەلەنگەن توپتار ءوز جولىندا ءبارىن قيراتتى.
مەملەكەتتىك توڭكەرىس جانە تەرروريزم
پرەزيدەنت قاسىم-جومارت توقاەۆتىڭ 20 مىڭ تەرروريست تۋرالى ايتقان سوزدەرى قوعامدا ۇلكەن رەزونانس تۋدىردى:
«سوندىقتان بانديتتەر سانى از بولعانىن ايتىپ، بۇل جاعدايدى مىسقىلعا اينالدىرۋ ءجونسىز دەپ ويلايمىن. شىن مانىندە ولار تولقىن-تولقىنمەن ءجۇردى، ولارعا بۇيرىق بەرىلىپ وتىرعانى تۇسىنىكتى جاعداي»، - دەدى قاسىم-جومارت توقاەۆ.
راسىندا بارشاعا بەلگىلى بولعان جايدى ءتىزىپ شىعۋدىڭ قاجەتى شامالى. ويتكەنى بيلىكتى كۇشپەن باسىپ الۋعا ارەكەتتەنۋ مەن كۇش قولدانىپ بەيبىت تۇرعىندارعا قاساقانا زورلىق-زومبىلىق كورسەتۋ كەشىرىلمەيتىن قىلمىس!
ورالباي مەرگەنبايۇلى،
«ادىرنا» ۇلتتىق پورتالى
