قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قىزى دينارا قۇلىباەۆا مەن ونىڭ كۇيەۋى تيمۋر قۇلىباەۆ گەرمانيادا ءتورت ءزاۋلىم جىلجىمايتىن مۇلىك ساتىپ الۋعا ءجۇز ميلليون دوللاردان استام قارجى سالعان، دەپ جازادى "ادىرنا" ۇلتتىق پورتالى nege.kz سايتىنا سىلتەپ.
ولاردىڭ تابىلعان ءساندى سارايلارى تۋرالى Deutsche Welle (DW) نەمىس مەديا كومپانياسىنىڭ زەرتتەۋىندە ايتىلدى. ماقالادا قازاقستاننىڭ بۇرىنعى پرەزيدەنتىنىڭ وتباسى مۇشەلەرىنە تيەسىلى ءزاۋلىم سارايلاردىڭ ءبىرى گەرمانيانىڭ بادەن-بادەن كۋرورتىنداعى زەەلاح ءۇيى ەكەندىگى ايتىلعان.
بۇل جەر 19 عاسىردا ايگىلى ورىس ديپلوماتى، قۇپيا كەڭەسشى ميحايل حرەپتوۆيچتىڭ رەزيدەنتسياسى بولعان. عيمارات ءىشى فرەسكالارمەن، ءساندى ليۋسترالارمەن جانە ءتۇرلى جاپسىرمالارمەن بەزەندىرىلگەن. ال توبەلەرى قۇندى اعاشتان جاسالعان.
سونداي-اق، جۋرناليستەر ءزاۋلىم سارايدىڭ اۋماعىندا سۋبۇرقاقتارى بار لاندشافت پاركى بار ەكەنىن، ال ونىڭ استىندا مىڭ شارشى مەترگە جۋىق كۋرورتتىق ايماق بار ەكەنىن ايتادى.
DW مالىمەتتەرى بويىنشا، زەەلاح ۇيىنەن باسقا، ەرلى-زايىپتى قۇلىباەۆتاردىڭ ايماقتا تاعى ءۇش جىلجىمايتىن مۇلكى بار. ولاردىڭ ەكەۋى تاريحى ەسكەرتكىشتەرگە جاتادى. ءبىرى — ايگىلى ساۋلەتشى گۋستاۆ سترونىڭ ۆيللاسى بولسا، ەكىنشىسى ءبىر كەزدەرى گەرمانيانىڭ ءبىرىنشى كانتسلەرى كونراد ادەناۋەردىڭ ءوزى دەمالۋدى ۇناتقان بۋلەرحاي سارايى كورىنەدى.
بۇعان دەيىن 2006 جىلى نۇرسۇلتان نازارباەۆتىڭ كىشى قىزى ءاليا نازارباەۆا بريتان ازاماتتىعىن الۋ ءۇشىن لوندوننىڭ سولتۇستىگىنەن جەكەجاي ساتىپ العانى ايتىلعان. The Sunday Telegraph انىقتاعانداي، ول قازاقستان اۋماعىنان 300 ميلليون دوللاردى شىعارعاننان كەيىن وسى جىلجىمايتىن مۇلىكتى ساتىپ الۋعا ەداۋىر قاراجات جۇمساعان.
"ادىرنا" ۇلتتىق پورتالى
