ماڭعىستاۋ وبلىسىنا اۋىزسۋ ماسەلەسى قالاي شەشىلمەك جانە حالىقتى ەڭبەكپەن قامتۋ بارىسى قالاي ءجۇرىپ جاتىر. اتالعان ماسەلەلەرگە قاتىستى ماڭعىستاۋ وبلىسىنىڭ اكىمى نۇرلان نوعاەۆ تۇسىنىك بەردى.
«مەملەكەت باسشىسىنىڭ تاپسىرماسىنا سايكەس ماڭعىستاۋ وبلىسىنىڭ 2021-2025 جىلدارعا ارنالعان دامۋ جوسپارى كەشەندى تۇردە جۇزەگە اسىپ جاتىر. جوسپارعا سايكەس 2 ترلن 200 ملرد تەڭگەنىڭ ءىس-شاراسى جوسپارلاندى. قاراستىرىلىپ وتىرعان قارجىنىڭ 65 پايىزى جۇمىسپەن قامتۋ، سوسىن شاعىن جانە ورتا كاسىپكەرلىكتى دامىتۋعا باعىتتالادى. ال كوكتەم كەلە جاتىر. ءبىزدىڭ وڭىرگە ءتان ماسەلەنىڭ ءبىرى اۋىز سۋ تاپشىلىعى. سالا ماماندارىنىڭ ايتۋىنشا، جىلدىڭ ناۋرىز-قىركۇيەك ايى ارالىعىندا تاۋلىگىنە 50 مىڭ تەكشە مەتر اۋىزسۋ تاپشىلىعى بايقالادى. وسى ورايدا ماڭعىستاۋلىقتاردى اۋىزسۋمەن قامتاماسىز ەتۋدى «استراحان-ماڭعىستاۋ» سۋ قۇبىرى ارقىلى جەتىلدىرە ءتۇسۋ كوزدەلىپ وتىر»، - دەدى نۇرلان نوعاەۆ ماڭعىستاۋ وبلىستىق قوعامدىق كوممۋنيكاتسيا ورتالىعىندا ونلاين وتكەن ءباسپاسوز ءماسليحاتىندا.
سونداي-اق، وبلىسى باسشىسى ايماقتاعى جۇمىسسىزدىق ماسەلەسىن كوتەردى.
«وڭىردەگى جۇمىسسىزدىق ماسەلەسىن جويۋ ماقساتىندا قازىرگى ۋاقىتتا «مەن جۇمىس ىستەيمىن»، «جاستار پراكتيكاسى» جانە تاعى سول سياقتى باعدارلامالار جۇزەگە اسىپ جاتىر. اتالعان باعدارلامالار اياسىندا جىل سايىن مىڭداعان ادامدار جۇمىسقا ورنالاسىپ جاتىر. بۇل شارا ودان ءارى ءوز جالعاسىن تابادى»، - دەيدى ول.
"ادىرنا" ۇلتتىق پورتالى
