Maŋǧystau oblysyna auyzsu mäselesı qalai şeşılmek jäne halyqty eŋbekpen qamtu barysy qalai jürıp jatyr. Atalǧan mäselelerge qatysty Maŋǧystau oblysynyŋ äkımı Nūrlan Noǧaev tüsınık berdı.
«Memleket basşysynyŋ tapsyrmasyna säikes Maŋǧystau oblysynyŋ 2021-2025 jyldarǧa arnalǧan damu jospary keşendı türde jüzege asyp jatyr. Josparǧa säikes 2 trln 200 mlrd teŋgenıŋ ıs-şarasy josparlandy. Qarastyrylyp otyrǧan qarjynyŋ 65 paiyzy jūmyspen qamtu, sosyn şaǧyn jäne orta käsıpkerlıktı damytuǧa baǧyttalady. Al köktem kele jatyr. Bızdıŋ öŋırge tän mäselenıŋ bırı auyz su tapşylyǧy. Sala mamandarynyŋ aituynşa, jyldyŋ nauryz-qyrküiek aiy aralyǧynda täulıgıne 50 myŋ tekşe metr auyzsu tapşylyǧy baiqalady. Osy oraida maŋǧystaulyqtardy auyzsumen qamtamasyz etudı «Astrahan-Maŋǧystau» su qūbyry arqyly jetıldıre tüsu közdelıp otyr», - dedı Nūrlan Noǧaev Maŋǧystau oblystyq qoǧamdyq kommunikasiia ortalyǧynda onlain ötken baspasöz mäslihatynda.
Sondai-aq, oblysy basşysy aimaqtaǧy jūmyssyzdyq mäselesın köterdı.
«Öŋırdegı jūmyssyzdyq mäselesın joiu maqsatynda qazırgı uaqytta «Men jūmys ısteimın», «Jastar praktikasy» jäne taǧy sol siiaqty baǧdarlamalar jüzege asyp jatyr. Atalǧan baǧdarlamalar aiasynda jyl saiyn myŋdaǧan adamdar jūmysqa ornalasyp jatyr. Būl şara odan ärı öz jalǧasyn tabady», - deidı ol.
"Adyrna" ūlttyq portaly
