مەملەكەت باسشىسى قاسىم-جومارت توقاەۆ الداعى جولداۋدا قاڭتار وقيعاسىنا قاتىستى تەرگەۋ قورىتىندىلارى تۋرالى ايتادى، دەپ حابارلايدى "ادىرنا" ۇلتتىق پورتالى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي ءوزىنىڭ فەيسبۋك پاراقشاسىندا جازدى.
"مەملەكەت باسشىسى قاڭتار وقيعاسى بويىنشا الدىن-الا تەرگەۋ جۇمىستارىنىڭ قورىتىندىلارىن ناۋرىزداعى قازاقستان حالقىنا جولداۋىندا جاريالايتىنىن جوسپارلاپ وتىر. قاسىم-جومارت توقاەۆ «Qazaqstan» تەلەارناسىنا بەرگەن كەشەگى سۇحباتىندا ايتقانىنداي، حالىقتان ەشتەڭەنى جاسىرىپ قالمايدى. بارلىق اقپارات جاريا ەتىلەدى. قازىر ءتيىستى ورگاندار اۋقىمدى تەرگەۋ جۇمىستارىن جۇرگىزۋدە. بۇعان ءبىراز ۋاقىت كەرەك.
پرەزيدەنت سۇحبات بارىسىندا اتاپ وتكەندەي، قوعامداعى ەڭ ماڭىزدى ماسەلە – زاڭ ۇستەمدىگى. ءدال وسى قۇقىقتىق پرينتسيپ نەگىزىندە قاڭتار وقيعاسى بارىسىندا ۇستالعان ازاماتتاردىڭ جاۋاپكەرشىلىك ماسەلەسى شەشىلەدى. ولاردىڭ باسىم كوپشىلىگىنىڭ جازاسى جەڭىلدەتىلگەنى ءمالىم. جۇزدەگەن ادام تەرگەۋ يزولياتورىنان بوساتىلدى. قاماۋداعى ازاماتتاردىڭ قۇقىقتارىن قورعاۋ جۇمىستارى جۇرگىزىلىپ جاتىر. قۇقىق قورعاۋ ورگاندارى قىزمەتكەرلەرىنىڭ زاڭسىز ءىس-ارەكەتتەرىنە بايلانىستى دا تەكسەرۋ جۇرگىزىلۋدە. سونىمەن قاتار اۋىر قىلمىس (كىسى ءولتىرۋ، توناۋ، قاراقشىلىق جانە ت.ب.) جاساعاندار زاڭعا سايكەس جازاعا تارتىلادى، - دەپ جازدى بەرىك ءۋالي.
ونىڭ ايتۋىنشا، پرەزيدەنت ناۋرىزدىڭ ورتاسىندا جاسايتىن جولداۋىندا ساياسي رەفورمالار بويىنشا ءوز باعدارلاماسىن ۇسىنادى.
سونداي-اق مەملەكەت باسشىسىنىڭ كەشەگى سۇحباتى كورەرمەن قاۋىمنىڭ زور قىزىعۋشىلىعىن تۋعىزعانىن اتاپ وتكىم كەلەدى. بۇل ەلىمىزدىڭ اقپارات كەڭىستىگىندەگى ماڭىزدى تاقىرىپقا اينالىپ ۇلگەردى دەپ ايتۋعا بولادى. وعان الەمنىڭ جەتەكشى اگەنتتىكتەرى بەلسەندى تۇردە سىلتەمە جاساۋدا. قاسىم-جومارت كەمەلۇلى قاتتى سۋىق تيگىزىپ العانىنا قاراماستان، بەرگەن ۋادەسىندە تۇردى. پرەزيدەنت وتانداستارىمىزدىڭ اتالعان ماسەلەگە ەرەكشە الاڭداپ وتىرعانىن ەسكەرىپ، ۇلتتىق تەلەارنانىڭ تىلشىسىنە بەرەتىن سۇحباتىن كەيىنگە شەگەرمەدى",- دەدى ول.
"ادىرنا" ۇلتتىق پورتالى
