ءماجىلىستىڭ بۇرىنعى توراعاسى نۇرلان نىعماتۋلين شەت ەلگە اتتاندى. بۇل تۋرالى Haqnazar Arnasy جاريالادى. نۇرلان نىعماتۋلين جاقىندارىمەن بىرگە لوندونعا كەتتى، دەپ حابارلايدى "ادىرنا" ۇلتتىق پورتالى “ەكسپرەسس ك” باسىلىمىنا سىلتەمە جاساپ.
جەلىدە نۇرلان نىعماتۋليننىڭ لوندونعا كەتكەنى تۋرالى حابار تارادى. ءماجىلىستىڭ ەكس-سپيكەرىمەن بىرگە ونىڭ جاقىن تۋىستارى دا شەت ەل اسقان.
"نىعماتۋليندەر وتباسىنا تيەسىلى بارلىق نىساندار مەن بيزنەستەر ساتىلىمعا شىعارىلدى", — دەپ جازدى Haqnazar Arnasy telegram-دا.
نۇرلان نىعماتۋلين بۇعان دەيىن لاۋازىمدى قىزمەتتەر اتقارعان. ول ەلوردا اكىمىنىڭ ورىنباسارى، كولىك جانە كوممۋنيكاتسيا ۆيتسە-ءمينيسترى، پرەزيدەنت اكىمىشىلىگىنىڭ باسشىسى، قاراعاندى وبلىسىنىڭ اكىمى، "نۇر وتان" پارتياسى توراعاسىنىڭ ءبىرىنشى ورىنباسارى، پرەزيدەنت اكىمشىلىگى باسشىسى، ءماجىلىس توراعاسى سەكىلدى لاۋازىمدى قىزمەتتەردى اتقاردى. ول قر پارلامەنتى ءماجىلىسىنىڭ ءۇش شاقىرىلىمىندا توراعا بولىپ، وسى قىزمەتتە 10 جىل بويى ءجۇردى.
نۇرلان نىعماتۋليننىڭ سىنارى ەرلان نىعماتۋلين 18 جىل دەپۋتات بولعان. 1999-2011 جىلدارى ءماجىلىس دەپۋتاتتىعىنا سايلانسا، 2012-2017 جىلدارى پرەزيدەنت جارلىعىمەن سەنات دەپۋتاتتىعىنا تاعايىندالدى.
ەستەرىڭىزگە سالا كەتەيىك، بۇعان دەيىن ءماجىلىس توراعالىعىنان نۇرلان نىعماتۋليننىڭ كەتكەنى تۋرالى جازعان بولاتىنبىز. ول سوڭعى رەت بۇل قىزمەتكە 2021 جىلدىڭ قاڭتار ايىندا بەكىتىلگەن.
"ادىرنا" ۇلتتىق پورتالى
