قوبىز جاساۋ ونەرى مەن وسى مۋزىكالىق اسپاپتا ويناۋ ءداستۇرى شۇعىل قورعاۋدى قاجەت ەتەتىن حالىقارالىق ماتەريالدىق ەمەس مادەني مۇرا تىزىمىنە ەنگىزىلدى. بۇل تۋرالى يۋنەسكو-نىڭ ماتەريالدىق ەمەس مادەني مۇرانى قورعاۋ جونىندەگى كوميتەتىنىڭ نيۋ-دەليدە ءوتىپ جاتقان 20-سەسسياسىندا ايتىلدى، دەپ حابارلايدى «ادىرنا» ءتىلشىسى.
وسىلايشا ساراپشىلار وزبەكستاننىڭ ۇسىنىمىن قاناعاتتاندىردى. ءۇندىستاندا وتكەن تالقىلاۋعا ۇسىنىلعان قۇجاتتى دايىنداۋ بارىسىندا ەلدىڭ مادەنيەت مينيسترلىگىنىڭ اۋقىمدى جۇمىس جۇرگىزگەنى ايتىلدى. ۆەدومستۆو يۋنەسكو-مەن بىرلەسىپ كونە مۋزىكالىق اسپاپ — قوبىز بەن جىراۋلىق ونەرگە قاتىستى كوپ دەرەك جيناپ، ارنايى زەرتتەۋ جۇرگىزگەن.
ءتىپتى قوعامنىڭ بۇل ءداستۇردىڭ ماڭىزى مەن ونى قورعاۋدىڭ وزەكتىلىگى تۋرالى حاباردارلىعىن ارتتىرۋ ماقساتىندا دەرەكتى فيلم دە تۇسىرىلگەن.
قوبىز بەن جىراۋلىق ءداستۇر وزبەكستان قۇرامىنداعى ەگەمەن رەسپۋبليكا – قاراقالپاقستاندا وتە تانىمال. ءبىر كەزدەرى قوبىز سۇيەمەلدەۋىمەن جىر ايتۋ ءداستۇرى كەڭ تارالعان ەدى، الايدا بۇگىنگى جاعداي ءماز ەمەس. سوندىقتان قوبىز جاساۋ ونەرى مەن قوبىزدا ويناۋ ءداستۇرىن يۋنەسكو تىزىمىنە ەنگىزۋ قاجەتتىلىگى تۋىنداعان.
ەسكە سالايىق، بۇعان دەيىن كيىز ءۇي جاساۋ ءداستۇرى يۋنەسكو-نىڭ مادەني مۇرا تىزىمىنە ەنگەن ەدى.
