قازاقستاندىق رەجيسسەر اسقار ۇزاباەۆ پەن پروديۋسەر بايان ماقساتقىزىنىڭ (رەسەيلىك بىرلەسكەن پروديۋسەر اننكا كاچكو) وتباسىنداعى زورلىق-زومبىلىق پروبلەماسى تۋرالى «باقىت» كوركەم ءفيلمى بەرلين كينوفەستيۆالىندە «پانوراما» بولىمىندە «كورەرمەن كوزايىمى» جۇلدەسىن جەڭىپ الدى، دەپ حابارلايدى "ادىرنا" ۇلتتىق پورتالى.
پانورامادا جەڭىمپازدى كينويندۋستريا ماماندارىنان قۇرالعان قازىلار القاسى ەمەس، كورگەننەن كەيىن داۋىس بەرەتىن شىنايى كورەرمەندەر انىقتايدى. بيىلعى جىلى نوميناتسياعا 29 كارتينا قويىلدى.
«باقىت» ءفيلمىنىڭ قورىتىندى ەپيزودىندا بۇۇ مالىمەتتەرى بويىنشا قازاقستاندا جىل سايىن 400-گە جۋىق ايەل تۇرمىستىق زورلىق-زومبىلىقتان ولەتىنى، ورتا ەسەپپەن ايىنا 120 زورلاۋ، 5232 ۇرىپ-سوعۋ، 72 دەنە جاراقاتىن سالۋ، 14 كىسى ءولتىرۋ جانە 48 ءوزىن-ءوزى ءولتىرۋ فاكتىلەرى ايتىلادى.
2016 جىلى كۇيەۋىنەن زورلىق كورگەن بايان ماقساتقىزى Current Time باسىلىمىنا بەرگەن سۇحباتىندا ستسەناريدەگى كوپ نارسەنىڭ ءوز ومىرىنەن الىنعانىن ايتتى.
«مەن ەلدەگى وتباسىلىق شىندىقتىڭ ەۋروپادا كورىنۋىن قالادىم، سوندا ول مەنىڭ ەلىمدە ءوز ناتيجەسىن بەرەتىن بولادى. مەن وتباسىلىق زورلىق-زومبىلىق تۋرالى زاڭنىڭ جۇمىس ىستەگەنىن قالايمىن. سوڭىندا ادامدار مۇنداي زاڭسىز ارەكەتتى ىستەۋ مۇمكىن ەمەس ەكەنىن ءتۇسىنىپ، جازالاناتىن بولادى. بەرليندەگى الەمدىك پرەمەرا ايتەۋىر اسەر ەتەدى دەپ سەنەمىن»، – دەيدى ماقساتقىزى.
فيلم پروديۋسەر ەسەبىنەن جانە كراۋدفاندينگ كەزىندە جينالعان اقشاعا ءتۇسىرىلدى.
"ادىرنا" ۇلتتىق پورتالى
