قازاقستاندا جەر قويناۋىن پايدالانۋشىلار مىندەتتەمەلەرىن تومەن ورىنداعان 175 كەلىسىمشارت انىقتالدى، دەپ حابارلايدى "ادىرنا" پورتالى پرەمەر-ءمينيستردىڭ ءباسپاسوز قىزمەتىنە سىلتەپ.
«تالداۋ بارىسىندا ۋاكىلەتتى ورگاندار مىندەتتەمەلەردىڭ تومەن ورىندالۋىنا قاتىستى 27, ال قاتتى پايدالى قازبالاردى جەكە مۇددەگە پايدالانۋعا قاتىستى بۇزىلعان 148 كەلىسىمشارتتى انىقتادى. ءتيىستى جول كارتاسى اياسىندا توقتاتۋ تۋرالى حابارلامالار جىبەرىلەتىن كەلىسىمشارتتار مەن ليتسەنزيالاردى انىقتاۋ جوسپارلانۋدا»، - دەلىنگەن جەكسەنبى كۇنى پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن وتكەن كەڭەستىڭ قورىتىندىسى بويىنشا حابارلامادا.
اتاپ وتكەندەي، «وسى جۇمىستاردىڭ ناتيجەسىندە دەپوزيتتەر جاڭا ينۆەستورلارعا بەرىلۋ ءۇشىن اۋكتسيونعا شىعارىلادى».
«اۋكتسيوندا جەر قويناۋىن پايدالانۋ قۇقىعىن بەرۋ بارلىق مۇددەلى ينۆەستورلاردىڭ قاتىسۋىنا تەڭ مۇمكىندىك بەرەدى. اۋكتسيونداردى وتكىزۋ تۋرالى اقپارات رەسپۋبليكالىق باسپا باسىلىمدارىندا جانە مەملەكەتتىك ورگانداردىڭ ينتەرنەت-رەسۋرستارىندا مىندەتتى تۇردە ورنالاستىرىلادى. قابىلدانعان شارالاردىڭ ناتيجەسىندە جەر قويناۋىن پايدالانۋ سالاسىنا، ءبىرىنشى كەزەكتە قاتتى پايدالى قازبالار كەن ورىندارىن يگەرۋگە ينۆەستيتسيا اعىنى ارتادى. ۇكىمەتتىڭ بۇل باعىتتاعى جۇمىسى ودان ءارى جالعاساتىن بولادى»، - دەپ سەندىردى مينيسترلەر كابينەتى.
"ادىرنا" ۇلتتىق پورتالى
