ۋكراينا پرەزيدەنتى ۆلاديمير زەلەنسكي اقش ۇسىنعان ۋكراينانىڭ پايدالى قازبالارىنىڭ 50%-ىنا قۇقىق بەرەتىن كەلىسىمگە قول قويۋدان باس تارتتى. بۇل تۋرالى Unian.net باسىلىمى جازدى، دەپ حابارلايدى “ادىرنا” ۇلتتىق پورتالى.
"ميۋنحەندەگى بىرنەشە زاڭ شىعارۋشى ماعان اقش كونگرەسى دەلەگاتسياسى زەلەنسكيگە ءبىر پاراق قاعاز ۇسىنعانىن ايتتى. وندا اقش-قا ۋكراينانىڭ بولاشاق مينەرالدىق قورلارىنىڭ 50%-ىنا قۇقىق بەرۋ قاراستىرىلعان. زەلەنسكي ونى سىپايى تۇردە قول قويۋدان باس تارتتى", – دەپ جازىلعان باسىلىمدا.
Reuters اگەنتتىگىنىڭ دەرەككوزدەرى ميۋنحەندەگى كەزدەسۋدە زەلەنسكيدىڭ اقش دايىنداعان كەلىسىمگە قاتىستى الاڭداۋشىلىق بىلدىرگەنىن حابارلادى.
"زەلەنسكي وزىنەن تانىسىپ ۇلگەرمەگەن قۇجاتقا قول قويۋدى تالاپ ەتىپ وتىرعانداي سەزىندى. بارىنە بىردەن قول قويۋعا دايىن ەمەسپىن. بىراق اقش-پەن پايدالى قازبالار جونىندەگى ىقتيمال كەلىسىمدى تالقىلاۋعا ءازىرمىن", – دەپ مالىمدەدى.
ۋكراينا كونستيتۋتسياعا نەگىزدەلگەن ءوز ۇسىنىسىن جاسايتىنىن اتاپ ءوتتى. الايدا رەسمي كيەۆ بۇل اقپاراتقا قاتىستى پىكىر بىلدىرگەن جوق.
ايتا كەتەيىك، اقش پرەزيدەنتى دونالد ترامپ امەريكانىڭ كومەگىنە قايتارىم رەتىندە ۋكراينامەن سيرەك جەر مەتالدارىن الدىرۋ تۋرالى كەلىسسوزدەر جۇرگىزگىسى كەلەتىنىن جەتكىزدى.
