قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى.
دەنساۋلىق ساقتاۋ ءمينيسترى اجار عينيات قازاقستاندا كوروناۆيرۋس ينفەكتسياسىمەن سىرقاتتانۋ جاعدايى تۇراقتانعانىن، سوڭعى اپتادا اۋرۋدىڭ تاۋلىكتىك ءوسىمى 1 200 جاعدايعا دەيىن تومەندەگەنىن ايتتى.
ەپيدەميولوگيالىق جاعدايدى باعالاۋ ماتريتساسىنا سايكەس، بۇگىندە قازاقستان رەسپۋبليكاسى «جاسىل» ايماقتا، 2 ءوڭىر «قىزىل» ايماقتا، 2 ءوڭىر «سارى» ايماقتا، قالعان وڭىرلەر «جاسىل» ايماقتا ورنالاسقان.
ەپيدەميولوگيالىق احۋال كورسەتكىشتەرىنىڭ وڭ سەرپىنى بايقالادى. ماسەلەن، سوڭعى ايدا كوروناۆيرۋس ينفەكتسياسى جاعدايلارىنىڭ ورتاشا تاۋلىكتىك سانى 34 ەسە ازايدى. ستاتسيونارلىق ەم الىپ جاتقان ادامداردىڭ سانى 2,3 ەسەگە، امبۋلاتوريالىق ناۋقاستار سانى 5,1 ەسەگە ازايدى.
بۇگىندە دەنساۋلىق ساقتاۋ ۇيىمدارىندا 30 مىڭنان استام پاتسيەنت ەم الىپ جاتىر. سوڭعى ايدا ينفەكتسيالىق توسەكتەردىڭ پايدالانىلۋى 2,2 ەسەگە – 38-دەن 17%-عا دەيىن، رەانيماتسيالىق توسەكتەردىڭ جۇكتەلۋى 6%-عا – 20-دان 14%-عا دەيىن تومەندەدى.
قازىرگى تاڭدا كوروناۆيرۋس ينفەكتسياسىنا قارسى ۆاكتسينانىڭ ءبىرىنشى كومپونەنتىن ەگىلۋى ءتيىستى ەرەسەك تۇرعىنداردىڭ 82,1% الدى، بۇل قر حالقىنىڭ جالپى سانىنىڭ 53,4% قۇرايدى.
ۆاكتسينانىڭ ەكىنشى كومپونەنتىن 9,4 ملن ادام الدى، بۇل ءتيىستى حالىقتىڭ 78,5%-ى جانە رەسپۋبليكانىڭ جالپى حالقىنىڭ 49,9%-ى.
ەلىمىزدەگى كوروناۆيرۋس ينفەكتسياسى بويىنشا ەپيدەميولوگيالىق جاعدايدىڭ تۇراقتانۋىن ەسكەرە وتىرىپ، ۆەدومستۆوارالىق كوميسسيا بيزنەس پەن حالىققا قاتىستى شەكتەۋ شارالارىن جەڭىلدەتتى.
ۇكىمەت باسشىسى ءاليحان سمايىلوۆ ەپيدەميولوگيالىق جاعدايعا مونيتورينگ جۇرگىزۋدى ودان ءارى جالعاستىرۋدى تاپسىردى.
«مەملەكەت باسشىسىنىڭ تاپسىرماسى بويىنشا بيزنەس پەن حالىققا سانيتارلىق تالاپتاردى جەڭىلدەتۋ شارالارى قابىلدانىپ جاتىر. سوعان قاراماستان اكىمدىكتەر حالىقتى ۆاكتسينالاۋ مەن رەۆاكتسينالاۋ جۇمىسىن جالعاستىرۋى ءتيىس. وڭىرلەردە ۆاكتسينا قورى جەتكىلىكتى»، — دەدى قر پرەمەر-ءمينيسترى.
سونىمەن قاتار مينيسترلەر كابينەتىنىڭ باسشىسى جوسپاردان ارتتا قالعان وڭىرلەردىڭ اكىمدەرىنە حالىقتى ۆاكتسينالاۋ جانە رەۆاكتسينالاۋ جۇمىستارىنا باقىلاۋدى كۇشەيتۋدى تاپسىردى.
"ادىرنا" ۇلتتىق پورتالى
