زەلەنسكي پۋتينگە تەلەفونمەن سويلەسۋگە نيەت ءبىلدىردى، دەپ حابارلايدى “ادىرنا” ۇلتتىق پورتالى.
«بۇگىن مەن رەسەي فەدەراتسياسىنىڭ پرەزيدەنتىمەن تەلەفون ارقىلى سويلەسۋگە نيەت ءبىلدىردىم. بىراق ازىرگە تىنىش. الايدا تىنىشتىق دونباسستا بولۋى كەرەك ەدى»، – دەدى زەلەنسكي.
زەلەنسكي ءوز ەلىنە ەشقانداي دا سوعىستىڭ قاجەت ەمەستىگىن العا تارتتى.
«بىزگە، ەشقانداي سوعىس – قىرعي-قاباق سوعىس تا، گيبريدتىك سوعىس تا، قاجەت ەمەس، مۇنى انىق بىلەمىز. بىراق بىزگە اسكەر كىرەتىن بولسا، ءبىزدىڭ مەملەكەتىمىزگە، بوستاندىعىمىزعا، ومىرىمىزگە، ءبىزدىڭ بالالارىمىزدىڭ ومىرىنە قول سۇعۋعا تىرىسسا، ءبىز قورعانامىز. (…) سوعىس – بۇل ۇلكەن قاسىرەت، بۇل قاسىرەتتىڭ باعاسى اۋىر»، – دەيدى ۋكراينا پرەزيدەنتى.
ءوز سوزىندە زەلەنسكي، ۋكراينا ەشقاشان رەسەيگە قاۋىپ توندىرمەگەنىن ايتتى. الداعى ۋاقىتتا دا قاۋىپ جوق ەكەنىن دە تىلگە تيەك ەتتى.
«سىزدەرگە ۋكراينا رەسەيگە قاۋىپ ءتوندىرۋى مۇمكىن دەپ ايتۋدا. الايدا بۇرىن دا بۇلاي بولماعان، قازىر دە جوق جانە بولاشاقتا دا بولمايدى. سىزدەر ناتو-دان قاۋىپسىزدىك كەپىلدىگىن تالاپ ەتۋدەسىزدەر. بىزدە ءوز قاۋىپسىزدىگىمىزدىڭ كەپىلدىگىن سىزدەردەن، رەسەيدەن جانە بۋداپەشت مەموراندۋمى بويىنشا كەپىلدەمە بەرگەن باسقالارىنان دا تالاپ ەتەمىز»، – دەيدى ول.
رەسەي دە ۋكراينا دا ءارتۇرلى حالىق ەكەنىن ايتتى. الايدا، بۇل نارسە ۇلان عايىر سوعىسقا سەبەپ ەمەستىگىن دە جەتكىزدى.
“ادىرنا” ۇلتتىق پورتالى
