سپورت پەن رۋحتىڭ شەكسىز بىرلىگى

زامزاگۇل فايزوللانوۆا كوپشىلىككە بوپاي لاقاپ اتىمەن تانىمال سپورتشى. ول – دزيۋدو، قازاق كۇرەسى، ەرەجەسىز جەكپە-جەك سياقتى ءۇش سپورتتىڭ شەبەرى عانا ەمەس، اياۋلى جار، ءۇش بالانىڭ اناسى، ەكى جوعارى ءبىلىمى بار اسكەري قىزمەتكەر. سپورت كۇنىنە وراي BAQ.KZ ءتىلشىسىنىڭ سپورتشىمەن بولعان سۇقباتىن ۇسىنامىز.

– زامزاگۇل، سپورتقا قالاي كەلدىڭىز؟

– مەنى سپورتقا 8 جاسىمدا اكەم الىپ كەلدى. اكەم – سامبو، قازاق كۇرەسى، سۋمو، دزيۋدو سياقتى كۇرەس تۇرلەرىنەن سپورت شەبەرى. سول سەبەپتى كىشكەنتايىمنان سپورتقا دەگەن قىزىعۋشىلىعىم قالىپتاستى. باسىندا گيمناستيكا، جەڭىل اتلەتيكا، جۇزۋمەن اينالىستىم، كەيىن دزيۋدوعا كەلدىم. باسىندا بۇل دا ۋاقىتشا دەپ ويلادىم، بىراق دزيۋدونى شىن ۇناتىپ قالدىم. بار بولعانى ءبىر اي دايىندالىپ، العاشقى جارىسىمدا ەكىنشى ورىن الدىم. سودان باستاپ اكەم مەن باپكەرلەرىم ماعان سەنىپ، قولداۋ كورسەتتى.

– دزيۋدو مەن قازاق كۇرەسى اراسىندا قانداي ايىرماشىلىقتار بار؟

– ەكى سپورت ءتۇرى دە ايلا مەن دايىندىقتى تالاپ ەتەدى. بىراق ايىرماشىلىعى – دزيۋدودا پارتەردە كۇرەسۋگە بولادى، ال قازاق كۇرەسىندە ونداي مۇمكىندىك جوق. ال ەرەجەسىز جەكپە-جەكتە وسى ەكى كۇرەستەگى تاسىلدەر وتە قاجەت. ماعان تەك بوكستان قول قويۋ جەتىسپەدى، قولىمدى قويعان سوڭ جەكپە-جەككە دە شىعا باستادىم.

– ءسىزدىڭ "بوپاي" دەگەن لاقاپ اتىڭىز بار. ول قايدان شىقتى؟

– مەنىڭ اتىمدى زامزاگۇل دەپ اجەم قويعان. بالكىم مەككەگە بارىپ، ءزامزام سۋىن ءىشۋدى ارمانداعانى ءۇشىن شىعار. ال "بوپاي" – كەنەسارى حاننىڭ قارىنداسى، كىشى ءجۇز حانى ءابىلحايىردىڭ جارى، باتىر، قايسار ايەل. بۇرىنعى مەنەدجەرىم مەنىڭ بويىمنان سول قاسيەتتەردى كورىپ، "بوپاي" دەپ اتاپ كەتكەن. ياعني، مەن باستاسام، سوڭىنا دەيىن بارامىن.

– اكەڭىز سپورتتىق مانسابىڭىزعا ەرەكشە اسەر ەتكەن سياقتى.

– ءيا، اكەم فايزوللا قويشىمانوۆ مەنىڭ ومىرلىك ۇستازىم. ول ماعان سپورت ارقىلى ادال ەڭبەك ەتۋدى ۇيرەتتى. اكەم: "ومىردە شىندىقتى تابۋ قيىن، ال سپورتتا ءبارى تەڭ، كىم كوپ ەڭبەكتەنسە سول جەڭەدى" دەپ ايتاتىن. بۇل مەن ءۇشىن ومىرلىك قاعيدا.

– ەكى جوعارى ءبىلىمىڭىز بار ەكەن. وقۋعا قالاي ۇلگەردىڭىز؟

– انام گاۋحار قويشىمانوۆا ءۇشىن ءبىزدىڭ ءبىلىم الۋىمىز وتە ماڭىزدى بولدى. ول ءوزى ۋنيۆەرسيتەتكە تۇسە الماعان. مەندە ەكى باكالاۆر، ءبىر ماگيستراتۋرا بار. دوكتورانتۋراعا تاپسىرىپ، 15 بالل جەتپەي قالدى. سول قۇجاتتارمەن زاڭ ماماندىعىنا ەكىنشى جوعارى بىلىمگە تاپسىرىپ، جاقسى باعالارمەن ءبىتىرىپ شىقتىم.

– سپورت پەن وتباسىن قاتار الىپ ءجۇرۋ قيىن ەمەس پە؟

– 2018 جىلى تۇرمىسقا شىقتىم. كۇيەۋىم مىقتىبەك ەكەۋمىزدىڭ ءۇش بالامىز بار: ەكى ۇل، ءبىر قىز. كەزىندە اقش-قا كەتىپ، UFC-دە ونەر كورسەتكىم كەلدى، بىراق ۆيزا بەرمەدى. سول كەزدە مىقتىبەك "سەن تالاي جىل تاتاميدە كۇرەستىڭ، ەندى بالا ءسۇيىپ، ءوزىڭ ءۇشىن ءومىر سۇرگىڭ كەلمەي مە؟" دەدى. ءسويتىپ وتباسىن قۇردىق. ول مەنى جاقسى تۇسىنەدى، مەن ەركىندىكتى جاقسى كورەمىن. كەيدە قىسىم كوپ بولسا، جارىلىپ كەتۋىم مۇمكىن. سوندىقتان قولداۋى ءۇشىن ريزامىن.

– ءۇش بالادان كەيىن سپورتقا قايتا ورالۋ قانشالىقتى قيىن بولدى؟

– ورالۋعا بولادى، بىراق قيىن. ۇلدارىمنان كەيىن تەز قالىپقا كەلدىم، ال قىزىمدى بوسانعاندا 22 كەلى سالماق قوسىپ الدىم. قازىر سونىڭ 16-سىن ارەڭ تاستادىم. ارينە، بالالارعا كوبىرەك ۋاقىت بولگىم كەلەدى، بىراق ولار ماحابباتتان كەندە ەمەس، جاقىندارىم كومەكتەسىپ جاتىر.

– كاسىپقوي سپورتتا قانداي جەتىستىكتەرىڭىزدى ەرەكشە اتار ەدىڭىز؟

– دزيۋدودان بەس دۇركىن، قازاق كۇرەسىنەن جەتى دۇركىن قازاقستان چەمپيونىمىن، "كوشپەندىلەر ويىندارىنىڭ" جۇلدەگەرىمىن. Alash Pride ليگاسىنىڭ العاشقى چەمپيونى رەتىندە قازىر دە تيتۋلىمدى قورعايمىن. مما-دا جەتىستىككە جەتۋ – مىنەزىمنىڭ ارقاسى. اسا ءتوزىمدى بولماساڭ، بۇل سپورتتا ونەر كورسەتە المايسىڭ. جەكپە-جەككە كەز كەلگەن قارسىلاسقا شىعۋعا دايىنمىن. قازىر 78 كگ سالماقتا قارسىلاس تابۋ قيىن، “بەرگەنىن الامىن”.

– كەزىندە جاراقاتتارمەن دە كۇرەسكەنىڭىز بەلگىلى. قازىر دەنساۋلىعىڭىز قالاي؟

–بۇرىن اقش-تا مۇرىن سىنعان كۇيدە، كەيدە ساۋساق سىنعانمەن دە جەكپە-جەككە شىققان كەزدەر بولدى. بىراق ول كەزدە تەك قارسىلاستى جەڭۋ تۋرالى ويلايسىڭ. قازىر اۋىر جاراقاتتار جوق، دەنساۋلىعىم جاقسى.

– ءسىز سپورتشى عانا ەمەس، اسكەري قىزمەتكەرسىز. بۇل سالاعا قالاي كەلدىڭىز؟

– مەن 8-سىنىپتان باستاپ ارميا ورتالىق سپورت كلۋبىندا بولدىم. 19 جاسىمدا اسكەرگە شاقىرىلدىم. ءبىر ايدان كەيىن اسكەري وليمپياداعا قاتىسىپ، بەسىنشى ورىن الدىم. اسكەردە بولۋ ءۇشىن ەلگە دەگەن سۇيىسپەنشىلىك كەرەك. كەيدە ۇيىقتاعىڭ كەلەدى، بىراق وتانعا دەگەن ماحاببات ءبارىن ەڭسەرۋگە كومەكتەسەدى.

– قانداي ارمانىڭىز بار؟

– گەنەرال بولعىم كەلەدى. ساۋلە ايتپاەۆا – ەلىمىزدەگى العاشقى ايەل گەنەرال. مەن ەكىنشىسى بولۋدى ارماندايمىن. كوبى "سەن اقىلدىسىڭ، ادەمىسىڭ، ساعان سپورت نە كەرەك؟" دەپ سۇرايدى. مەنىڭ جاۋابىم بىرەۋ قازاق قىزدارى ەجەلدەن باتىر، جەرى مەن نامىسى ءۇشىن سوعىسقان. بۇل ءبىزدىڭ قانىمىزدا بار.

– ارمانىڭىزعا جەتىڭىز، اڭگىمەڭىزگە راقمەت!