ەندى كىشىگىرىم اقپاراتتاردى قورىتساق.
رەسەي اسكەرى باسىپ كىرىپ، سوققىنى زىمىران جانە اۋە كۇشتەرى ارقىلى جاسادى. العاشقى سوققىلار اسكەري قويمالار، اۋەجاي مەن اسكەري نىساندارعا، بەكەتتەرگە جاسالدى. ارتىنشا دونەتسك پەن لۋگانسك ماڭىنداعى سەپاراتيستەر شابۋىلعا شىقتى. رەسەي مەن سەپاراتيستەر جاپپاي ارتيللەريالىق سوققى جاساۋدى ىسكە اسىردى.
حالىقتا ۇرەي، قورقىنىش، سەنىمسىزدىك پايدا بولدى. اسكەردە ەمەس، قاراپايىم حالىقتا. ارينە، كەز كەلگەن سوعىستىڭ باستاۋى سولاي بولادى. جەلىنى جاپپاي جالعان اقپارات كەزىپ كەتتى. ەكى تاراپ تا ءوز شىعىندارىن ازايتىپ، قارسى تاراپتىڭ شىعىنىن كوبەيتىپ كورسەتۋدە. ول تۇسىنىكتى دە.
ەندى مىنە سوعىس شوگىنان حالىق تا، بيلىك تە، اسكەر دە ەس جيا باستاعانداي. «ءۇش كۇندە كورگە دە ۇيرەنەسىڭ» دەگەندەي ءۇش ساعات وتكەن سوڭ شوك اسەرى اقىرىنداپ كەتۋدە. العاشقى سوققىلار وسىلاي بولاتىنى بەلگىلى دە ەدى. ەندى مىندەت قانداي؟ الدىمەن اسكەردىڭ رۋحىن ءتۇسىرىپ الماۋ كەرەك. ول ءۇشىن «باسشىلىق ەلدەن كەتتى» دەگەن جالعان اقپاراتتار شىققان ساتتە، بىردەن پرەزيدەنتتىڭ تىكەلەي ەفيردەگى ۇندەۋى جاۋاپ بولۋى ءتيىس. ەكىنشىدەن قورعانىستان شابۋىلعا ءوتۋدى قاراستىرىپ جاتىر دەپ ۇمىتتەنەمىن. جاۋ اسكەرىنىڭ شىعىنىن بارىنشا فوتو-ۆيدەو ارقىلى تاراتىپ، باسقىنشى اسكەرىنىڭ رۋحى مەن رەسەي حالقىنىڭ كوڭىل-كۇيىنە اسەر ەتۋ ماڭىزدى. ۋكراينا اسكەرى قورعانىس قابىلەتىن جوعالتىپ الماي، باسقىنشى تاراپتىڭ جاياۋ اسكەرى كىرۋىنە دەيىن شىداسا، سول ساتتە جاۋعا جاقسى سوققى بەرۋگە بولادى دەپ ويلايمىن.
"ادىرنا" ۇلتتىق پورتالى
