قازىرگى تاڭدا جاستاردى اسكەري قىزمەتكە دايارلاۋمەن شۇعىلداناتىن مەكەمەلەرمەن جاۋاپتى تۇلعالار، بولاشاق ساربازداردى قازاقستان رەسپۋبليكاسىنىڭ اسكەري بولىمدەرىندە تابىستى قىزمەت ەتۋگە دايارلاۋعا اسا جاۋاپكەرشىلىكپەن قاراۋدا. ەلىمىزدىڭ قورعانىس قابىلەتىن قامتاماسىز ەتۋ - بۇكىلحالىقتىق ءىس جانە ول ءۇشىن جاستاردىڭ بويىندا ءوز ەلىنە دەگەن پاتريوتتىق سەزىم، وتانىنا دەگەن سۇيىسپەنشىلىك، ەلىمىزدىڭ قاۋىپسىزدىگى مەن قارقىندى دامۋىنا دەگەن جاۋاپكەرشىلىكتى سەزىنۋ سەكىلدى قاسيەتتەردى قالىپتاستىرا ءبىلۋ جاۋاپتى دا، ماڭىزدى ءىس-شارالاردىڭ ءبىرى بولماق.
بولاشاق ساربازداردى ەلىمىزدىڭ قارۋلى كۇشتەرىندە وزدەرىنىڭ ازاماتتىق بورىشىن وتەۋگە دايىنداۋدا مەكتەپ ۇجىمىنىڭ اتقاراتىن ءرولى ۇشان تەڭىز. بۇل تۇرعىدا سانالى عۇمىرىن ۇستازدىق جولىنا ارناعان بىلىكتى مامان زاپاستاعى پودپولكوۆنيك قۇسايىنوۆ ساتىۆالدى توقتاربايۇلىنىڭ جاۋاپتى قىزمەتىن تىلگە تيەك ەتسەك ارتىق بولماس.
شاكىرتسىز ۇستاز تۇل دەمەكشى، شاكىرتتەرى بيىك بەلەستەردى باعىندىرىپ، جوعارى جەتىستىكتەرگە جەتىپ جاتسا ۇستاز ءۇشىن ودان ارتىق قانداي باقىت كەرەك. وسى ماكساتتا تىنباي ەڭبەك ەتىپ، وزىنە جۇكتەلگەن جاۋاپتى مىندەتتى ابىرويلى اتقارىپ جۇرگەن س.قۇسايىنوۆ قىزمەت ەتە ءجۇرىپ تالاي شاكىرت تاربيەلەدى. سولاردىڭ ءبىرى قر ۇقك شەكارا اكادەمياسى 3-وقۋ ديۆيزيونىنىڭ كۋرسانتى زادەري دەۆيد رومانوۆيچ.
الماتىداعى №5 مەكتەپتە ساباق بەرىپ جۇرگەن بىلىكتى مامان، سول جەردە ءجۇرىپ 10-سىنىپ وقۋشىسى د.زادەريدى بىرنەشە رەت اسكەري-پاتريوتتىق كلۋبتارعا جانە اسكەري جوعارى وقۋ ورىندارىندا ۇيىمداستىرعان شارالارعا اپارىپ، ونىڭ اسكەري سالاعا دەگەن قىزىعۋشىلىعىن ارتتىرعان.. كەيىننەن مەكتەپتى ويداعىداي اياقتاعان دەۆيد رومانوۆيچ كوپ ويلانباستان قر ۇقك شەكارا اكادەمياسىنا وقۋعا تاپسىرعان. بۇگىندە، وقۋشىسىن ماقتان تۇتقان مەكتەپ ۇجىمى، شەكاراشى كۋرسانتتىڭ سۋرەتىن قۇرمەت تاقتاسىنا ءىلىپتى.
«ۇستازدىق ەتكەن جالىقپاس ۇيرەتۋدەن بالاعا»، - دەپ اباي اتامىز ايتقانداي ساتىۆالدى توقتاربايۇلى، بۇگىندە بوستاندىق اۋدانىنا قاراستى ەرمەنساي اۋىلىنداعى NGS جاڭا بۋىن اقىلى مەكتەبىنىڭ العاشقى اسكەري جانە تەحنولوگيالىق دايىندىق ءپانىنىڭ مۇعالىمى بولىپ ەڭبەك ەتىپ ءجۇر.
جاقىندا ءبىز ءسوز ەتىپ وتىرعان بىلىكتى مامان ءوزى قىزمەت ەتىپ جۇرگەن NGS جاڭا بۋىن اقىلى مەكتەبىنىڭ 50-گە جۋىق 10-سىنىپتىڭ وقۋشىلارىن شەكارا اكادەمياسىنا اكەلىپ، اكادەميانىڭ تىنىس-تىرشىلىگىمەن تانىستىردى. شارا بارىسىندا وقۋشىلار اكادەميانىڭ ارنايى تاكتيكالىق فاكۋلتەتىنە قاراستى جالپى اسكەري پاندەر جانە اتىس دايىندىعى كافەدرالارىن ارالادى. وندا تاجىريبەلى شەكاراشى، بىلىكتى وفيتسەرلەر وقۋشىلارعا بىرنەشە مينۋت ءدارىس وقىپ، كافەدرانىڭ شىعۋ تاريحىنا قاتىستى دەرەكتى فيلم كورسەتتى. اسىرەسە، اتىس دايىندىعى كافەدراسىندا وقۋشىلاردىڭ قىزىعۋشىلىعى ارتتى. مۇندا شەكاراشى وفيتسەرلەر اك-74 اۆتوماتى مەن ماكاروۆ تاپانشاسىن بەلگىلەنگەن نورماتيۆتەر بويىنشا شاشىپ، قايتا جينادى. ەڭ قىزىعى، جاڭاعى بۇزىپ جيناعان كانىگى اۆتومات پەن تاپانشانىڭ ەلەكتروندى نۇسقاسىنان نىسانا كوزدەگەن وقۋشىلار وزدەرىنىڭ مەرگەندىكتەرىن سىناپ، نىساناعا ءدال تيگىزۋگە تىرستى. سودان كەيىن 3-وقۋ ديۆيزيونىنا كىرىپ، كۋرسانتتاردىڭ كازارماسىن ارالاپ كوردى. سول ساتتە كۋرسانت زادەري دەۆيد رومانوۆيچ وقۋشىلار اراسىنداعى ۇستازىن كورىپ، ونى باس سالا قۇشاقتاپ، قۋانىشتان كوزىنە جاس الدى. ءوز كەزەگىندە شاكىرتىن وقۋشىلارعا ماقتانا تانىستىرعان س.قۇسايىنوۆ ونىڭ الداعى قىزمەتىنە ساتتىلىك تىلەدى.
«جالپى ءبىلىم بەرۋ مەكەمەلەرىندەگى «العاشقى اسكەري دايىندىق» ءپانى مەن پاتريوتتىق تاربيە جۇمىستارىنىڭ ماڭىزى جىل سايىن ارتىپ كەلەدى. جاستاردى اسكەري قىزمەتكە دايارلاۋدا العاشقى اسكەري دايىندىق بولىمدەرى وقۋشىلاردى پاتريوتتىق رۋحتا تاربيەلەۋ ءۇشىن كوپتەگەن يگى ءىس شارالاردى جۇزەگە اسىردى. اتاپ ايتقاندا، وقۋشىلاردى الماتى قالاسى بويىنشا ۇيىمداستىرىلعان اۋداندىق جانە قالالىق جارىستارعا قاتىستىرىپ، تالاي رەت جۇلدەلى ورىنداردى يەلەندىك. سونىمەن قاتار، الماتى قالاسى بويىنشا العاشقى اسكەري دايىندىقتان بەرەتىن وقىتۋشىلار اراسىندا تالاپقا ساي جابدىقتاعان ەڭ ۇزدىك كابينەت نوميناتسياسىن جەڭىپ الدىق. وسى ءپاندى وقىتۋ بارىسىندا، وقۋشىلاردىڭ تەوريالىق بىلىمدەرى مەن تاجىريبەلىك داعدىلارى شىڭدالىپ، اسكەري-پاتريوتتىق جارىستارعا قاتىسۋ ارقىلى اسكەري قىزمەتكە دەگەن قىزىعۋشىلىعى ارتادى. ونىڭ ۇستىنە، اسكەري جوعارى وقۋ ورىندارىنا ءجيى-ءجيى بارىپ، تىعىز قارىم-قاتىناس ورناتقاننىڭ ارقاسىندا الداعى ءومىرىن اسكەري سالامەن بايلانىستىرعىسى كەلەتىن وقۋشىلاردىڭ قاتارى جىلدان-جىلعا كوبەيىپ كەلەدى»، -دەيدى ول بىزگە بەرگەن سۇقباتىندا.
مىڭ رەت ەستىگەنشە، ءبىر رەت كورگەن ارتىق دەمەكشى، وسىنداي شارالار بارىسىندا جاستار مەن جاسوسپىرىمدەردىڭ اسكەري ومىرگە دەگەن قىزىعۋشىلىعى وياناتىنى انىق. سوندىقتان بولۋ كەرەك ءبىز ءسوز ەتىپ وتىرعان ساتىۆالدى توقتاربايۇلى وقۋشىلاردى تاجىريبەلىك ساباقتارعا ارالاستىرعاندى ۇردىسكە اينالدىرعان. سونىڭ ناتيجەسىندە، قاستەرلى شەكاراشى ماماندىعىن تاڭدايتىن وقۋشىلار قاتارى وسۋدە.
ءيا، ايتسا ايتقانداي-اق شىنىندا دا، جەلكىلدەپ ءوسىپ كەلە جاتقان جاستارسىز ەل بولاشاعىن كوز الدىڭا ەلەستەتۋ ءتىپتى دە مۇمكىن ەمەس. اسكەري قاتال ءتارتىپتى، ادالدىقتى، جولداستىق سەزىمدى وسىنداي ءىس-شارالاردان بويىنا ءسىڭىرىپ وسكەن ۇرپاق ومىرلىك جولىندا قانداي دا بولسىن قيىندىقتاردى وڭاي ەڭسەرەدى. ولاي بولسا، وتان قورعاۋ - ناعىز ەردىڭ ءىسى! وتانعا قىزمەت –ابىرويلى مىندەتى.
جانات جابىربەكوۆ،
قر ۇقك شەكارا اكادەمياسىنىڭ
ءباسپاسوز حاتشىسى
