قازاقستان ۇكىمەتى ونەركاسىبى ورگە دومالاعان ەلدەردىڭ قاتارىنا قوسىلۋ ءۇشىن قىرۋار جۇمىس اتقارىپ جاتىر. الايدا مۇنداي جەتىستىككە بىردەن جەتە قويۋ قيىن. ونىڭ ۇستىنە تۇرعىندار دا ەكونوميكانىڭ تەز قارىشتاۋىن تالاپ ەتىپ، ءتيىستى باسشىلاردى سىنعا الىپ جاتسا.
بۇگىن قازاقستان رەسپۋبليكاسىنىڭ پرەمەر-ءمينيسترىنىڭ ءبىرىنشى ورىنباسارى رومان سكليار ۇكىمەت جيىنىنان سوڭ جۋرناليستەر سۇراعىنا جاۋاپ بەردى. ول وتاندىق ءاۆتووندىرىستى قولداۋ كەرەكتىگىن ايتىپ، شيكىزات ونىمىنە بايلانعان ەكونوميكادان بىرتە-بىرتە ارىلۋ كەرەكتىگىن جەتكىزدى.
كەيبىر قوعام بەلسەندىلەرى ۋتيلالىمنىڭ كولەمىن تومەن ءتۇسىرۋدى تالاپ ەتسە، كەيبىرى ءتىپتى الىپ تاستاۋدى ۇسىندى. سونداي-اق ۆيتسە-پرەمەردىڭ قىزمەتتەن كەتۋىن تالاپ ەتكەندەر دە بولدى.
– مەن قىزمەت ءۇشىن ەمەس، حالىق ءۇشىن ەڭبەك ەتىپ جاتىرمىن. ەگەر قاتە ىستەسەم ءاربىر ىسىمە جاۋاپ بەرۋگە دايىنمىن. ماسەلە قىزمەتتە ەمەس، ماسەلە ءبىزدىڭ ەلدە ونەركاسىپتىڭ ءبىر ىزگە قويىلۋ قاجەتتىلىگىندە، – دەدى ۆيتسە-پرەمەر.
رومان سكليار مۇنايعا بايلانۋدىڭ قاجەتى جوق ەكەنىن ءتۇسىندىردى.
– ءبىزدىڭ ەلدە كەيبىر ساياساتتانۋشىلار قوعامدىق سانانى شەبەر تۇردە مانيپۋلياتسيالايدى. مۇمكىن ولاردىڭ جۇمىسى سول شىعار. بىراق ءبىز نەگە مۇندايعا ەرۋىمىز كەرەك؟ ەگەر ءبىز ءوز ەلىمىزدى ونەركاسىبى دامىعان ەلدەر قاتارىنان كورگىمىز كەلسە، وندا بوس ۇراندارعا جول بەرمەۋىمىز كەرەك، – دەدى ۆيتسە-پرەمەر.
ەستەرىڭىزگە سالا كەتسەك، ۋتيليزاتسيالىق الىمىنىڭ مولشەرلەمەسى ەكى ەسەگە تومەندەگەنىن رومان سكليار «حابار 24» ارناسىنا بەرگەن سۇحباتىندا ايتقان بولاتىن.
"ادىرنا" ۇلتتىق پورتالى
