قۇرمەتتى قاسىم-جومارت كەمەلۇلى!
قادىرلى ارىپتەستەر!
ەڭ اۋەلى بارلىق پارتيالاستار مەن جاقتاستاردى پارتيانىڭ قۇرىلعان كۇنىمەن قۇتتىقتايمىن. بۇگىن كوكتەمنىڭ بەتاشار كۇنى، بۇگىن العىس ايتۋ كۇنى!
1999 جىلدىڭ 1-ناۋرىزىندا پارتيانىڭ قۇرىلتاي سەزى اشىلىپ، وعان 400-گە جۋىق دەلەگات قاتىسقان ەدى. ودان بەرى پارتيا مۇشەلەرىنىڭ سانى 800 مىڭعا دەيىن ءوستى.
بۇگىن كوپتەگەن پىكىرلەر ايتىلۋدا، ءتىپتى پارتيانى تاراتۋ كەرەك دەگەن. ساياساتتانۋشى رەتىندە ايتارىم - مەملەكەت جۇيەسى، ساياسي جۇيەسىنىڭ نەگىزگى ەلەمەنتى، تۇتقاسى - ساياسي پارتيا بولىپ تابىلادى.
تاۋەلسىز ەلىمىزبەن بىرگە ءوسىپ، باستى قوعامدىق-ساياسي وقيعالاردىڭ بەل ورتاسىندا جۇرگەن پارتيامىزدىڭ وسى جىلدارى مەملەكەتتىلىكتى نىعايتۋعا سىڭىرگەن ەڭبەگىن جوققا شىعارۋ مۇمكىن ەمەس، قادىرلى اعايىن.
مىنە، ارادا 23 جىل وتكەن سوڭ ءبىز ەلىمىز بەن پارتيامىزدىڭ تاريحىنداعى جاڭا كەزەڭگە اياق باسقالى تۇرمىز.
قۇرمەتتى وتانداستار، بۇگىن بارشامىز كورشىلەس ەلدەر سەكىلدى ۇلكەن جولدىڭ قيىلىسىندا تۇرمىز - ءبىرتۇتاس ۇلت رەتىندە ءبىر جەڭنەن قول، ءبىر جاعادان باس شىعارىپ، ءارى قارايعى دامۋ قۇقىعىمىزدى دالەلدەيتىن كەز كەلدى. جاعداي كۇن ساناپ وزگەرۋدە، مەملەكەتتىك جۇيەنى بۇرىن-سوڭدى بولماعان كۇيزەلىسكە ۇشىراتقان جايى بار.
جاڭا عانا اتقارۋشى حاتشى اسحات ورالوۆ ايتىپ وتكەندەي، "Nur Otan" پارتياسى قايتادان تۇلەپ، "جاڭا قازاقستان" ستراتەگيالىق مودەلىنە ءوز بولمىسىمەن، ءوز ىسىمەن ۇلگى بولۋى ءتيىس. زامان وزگەردى، ەل وزگەردى - پارتيانىڭ دا تۇبەگەيلى وزگەرەتىن كەز كەلدى، ءتىپتى اتاۋى، قۇرىلىمى، جۇمىس مودەلى دە وزگەرۋ كەرەك!
قۇرمەتتى پارتيالاستار! مەنى جاقسى بىلەسىزدەر، 2007 جىلدىڭ باسىندا وقۋدان ورالا سالىسىمەن پارتيا قاتارىنا قوسىلدىم. پارتيا مۇشەلەرىنىڭ ەكىنشى بۋىنى دەۋگە بولادى، ورتالىق اپپاراتتا قىزمەت ەتتىم، كوپشىلىگىڭىزبەن بىرگە جۇمىس ىستەدىك.
قادىرلى ارىپتەستەر، جەكە باسىمنان سىزدەرگە دەگەن ۇلكەن ءوتىنىشىم، قازىرگىدەي ۋاقىتتا پارتيانىڭ ۇيىتقىلارى، بەلسەندىلەرى، ارداگەرلەرى، بارلىعىمىز كۇش بىرىكتىرۋىمىز كەرەك!
پارتيا مودەرنيزاتسياسى اياسىندا ءبىر-ەكى ۇسىنىسىم بار.
بىرىنشىدەن, قوعاممەن بايلانىستى، كوممۋنيكاتسيا جاساۋدى جەلىلىك پرينتسيپتەرگە كوشىرۋ كەرەك، "تسيفرلىق دەموكراتيانى" دامىتۋ ءۇشىن زاماناۋي تەحنولوگيالاردىڭ بارلىق مۇمكىندىكتەرىن پايدالانۋ كەرەك.
ەكىنشىدەن, پارتيا قوعامنىڭ سۇرانىسىنا انىقتاۋعا بىرقاتار قۇرالدارى بار - قوعامدىق قابىلداۋلار - پارتيا مۇشەلەرى - باستاۋىش پارتيا ۇيىمدارى. بىراق كەلىپ تۇسەتىن مالىمەتتەردىڭ كەڭ اۋقىمى پايدالانۋسىز قالىپ جاتىر. بۇل ءۇشىن پارتيا جۇمىسىنا "Big Data" تەحنولوگياسىن ەنگىزۋ قاجەت، ول اقپاراتتىق قۇرالداردى بىرىڭعاي جۇيەگە بىرىكتىرۋگە مۇمكىندىك بەرەدى.
بۇل تەحنولوگيالار قوعام ءۇشىن ءدال قازىر وزەكتى پروبلەمالار تۋرالى ناقتى اقپارات الۋعا، ولاردى زەردەلەۋگە جانە وڭتايلى شەشىمدەر ۇسىنۋعا مۇمكىندىك بەرەدى.
سوڭعى بىرنەشە جىلدا جەكە كومپانيادا ءبىلىم سالاسىندا جوبالاردى جۇزەگە اسىرۋمەن اينالىستىم. بىراق ءدال قازىر جەكە مۇددەنى ىسىرىپ قويىپ، حالىق مۇددەسى ءۇشىن جۇمىس ىستەۋ كەرەك دەپ بىلەمىن.
قاسىم-جومارت كەمەلۇلى, ەسىڭىزدە بولسا الدىنعى جىلى ۇلتتىق كەڭەستىڭ وتىرىسىندا مەن سىزگە ءوز زامانداستارىمنىڭ اتىنان ۇسىنىس ءبىلدىرىپ، ەل ءۇشىن حالىق ءۇشىن ءبىزدى وتقا تاستاڭىز دەپ ايتقان ەدىم.
نازىم حيكمەت ايتقانداي:
مەن جانباسام لاپىلداپ،
سەن جانباساڭ لاپىلداپ،
ءبىز جانباساق لاپىلداپ،
اسپان قالاي اشىلماق.
ەندەشە جاڭعىرۋعا بەت العان پارتيامىزدىڭ بارشا مۇشەلەرىن پرەزيدەنتىمىزدىڭ توڭىرەگىنە توپتاسىپ، جاڭا قازاقستاننىڭ قالىپتاسۋىنا ۇلەس قوسۋعا شاقىرامىن!
وسەك-اياننىڭ قۇربانى بولماي،
وزبىرلاردىڭ شۇلعاۋى بولماي،
ەلىمىزگە ىرىس-قۇت ورناسىن،
جەرىمىزگە تىنىشتىق ورناسىن!
امان بولايىق! نازارلارىڭىزعا راحمەت!
