قازاقستاننىڭ سىرتقى ىستەر مينيسترلىگى ۇلىبريتانيا تاراپىنىڭ بريتانيالىق پارلامەنت دەپۋتاتىنىڭ مالىمدەمەسىن ءتۇسىندىرۋىن كۇتىپ وتىر، دەپ حابارلايدى “ادىرنا” ۇلتتىق پورتالى Sputnik.kz سايتىنا سىلتەمە جاساپ.
جۋىردا دەپۋتات مارگارەت حودج ۇلىبريتانيانىڭ سىرتقى ىستەر مينيسترىنەن "پۋتينگە قولداۋ كورسەتەتىن" قازاقستان مەن ازەربايجانعا قارسى سانكتسيالار ەنگىزۋگە بولا ما دەپ سۇراعان بولاتىن.
ۇلىبريتانيانىڭ سىرتقى ىستەر مينيسترلىگىنىڭ باسشىسى ليز تراسس بۇل ماسەلەنى انىقتاپ زەرتتەۋ كەرەكتىگىن ايتتى.
"بۇل پارلامەنتتە ءسوز سويلەگەن ءبىر دەپۋتاتتىڭ مالىمدەمەسى. ۇلىبريتانيانىڭ قازاقستانداعى ەلشىسى (كەتي ليچ - Sputnik) بۇگىن سىرتقى ىستەر مينيسترلىگىنە شاقىرىلدى. ءبىز ودان وسى جاعدايعا قاتىستى تۇسىنىكتەمە كۇتەمىز", - دەدى سىرتقى ىستەر ءمينيسترىنىڭ ورىنباسارى شاحرات نۇرىشەۆ پارلامەنت كۋلۋارىندا.
جۋرناليستەر ۆيتسە-مينيستردەن ۆلاديمير جيرينوۆسكيگە (رەسەي مەملەكەتتىك دۋماسىنىڭ دەپۋتاتى) ۇقساس حودجعا دا سانكتسيالار ەنگىزۋگە بولا ما دەپ سۇرادى.
ءسىم وكىلى مۇنداي ماسەلە ءالى قاراستىرىلىپ جاتقان جوق دەپ جاۋاپ بەردى.
قاڭتار وقيعاسىنان كەيىن ءدال وسى مارگارەت حودج قازاقستاننىڭ "كلەپتوكراتيالىق ەليتاسىنا" قارسى سانكتسيالار ەنگىزۋدى ۇسىنعان ەدى.
“ادىرنا” ۇلتتىق پورتالى
