الماتىدا V حالىقارالىق فارابي وقۋلارى اياسىندا “تۇراقتى دامۋ ماقساتىنداعى حالىقارالىق جۋرناليستيكانى وقىتۋ مودەلدەرى (MTIJ)” اتتى ءۇشىنشى حالىقارالىق عىلىمي-تاجىريبەلىك كونفەرەنتسيا ءوتتى دەپ حابارلايدى Adyrna.kz پورتالى قازۇۋ ستۋدەنتتىك ءباسپاسوز ورتالىعىنا سىلتەمە جاساپ.
عىلىمي كونفەرەنتسيا «ماماندىققا وقىتۋدىڭ جاڭا الگوريتمدەرى»، «2018 جىلدىڭ مەديا-ترەندتەرى»، «ءىىى كونفەرەنتسيا (مTIJ): كەڭەس بەرۋ جانە ديالوگ فورماتتارى» باعىتتارىن قامتىپ، «ونلاين-ءبىلىم بەرۋ ۇدەرىستەرى»، «الەمدىك قاۋىپ-قاتەرلەر جۇيەسىندەگى جۋرناليستيكا» «تۇراقتى دامۋ كلاستەرىندەگى مەدياسفەرا»، «مەديانى روبوتيزاتسيالاۋ»، «پوستشىندىق كەزەڭى جانە كونتەنتتى تەكسەرۋ»، «Crowdlearning: اۋديتوريانى زەرتتەۋدىڭ جاڭا دەڭگەيى»، «كيبەر سوعىستار جانە جەكە قاۋىپسىزدىك تاۋەكەلدەر» تاقىرىپتارىندا ءوربىدى.
كونفەرەنتسيانى جۋرناليستيكا فاكۋلتەتىنىڭ دەكانى ساعاتبەك مەدەۋبەكۇلى اشىپ، بيىل ءۇشىنشى مارتە وتكىزىلىپ وتىرعان جيىن جۇمىسىنا ساتتىلىك تىلەدى. جۋرناليستەر دايارلاۋداعى وزەكتى ماسەلەنى كەڭ ءارى اشىق تالقىلاۋ ءبىلىم بەرۋ جانە مەديا سالاسىنداعى ساراپشىلاردىڭ ءوزارا تاجىريبە الماسىپ، ماسەلەنى بىرىگىپ شەشۋىنە ىقپال ەتەرى داۋسىز دەگەن سەنىم ءبىلدىردى.
كونفەرەنتسيا مودەراتورى يۋنەسكو، حالىقارالىق جۋرناليستيكا جانە قوعامدىق مەديا كافەدراسىنىڭ مەڭگەرۋشىسى نازگۇل شىڭعىسوۆا اقپاراتتىق كونتەنتتى ساۋاتتى قالىپتاستىرىپ، تىلدىك جانە قۇقىقتىق تۇرعىدان بىلىكتىلىك تانىتاتىن ماماندار دايارلاۋداعى وزەكتى ماسەلەلەردى ويتالقىعا سالاتىن عىلىمي جيىننىڭ ماڭىزدىلىعىن اتاپ ءوتتى. «حالىقارالىق جۋرناليستيكا» ماماندىعىنىڭ وزەكتى ماسەلەلەرىن تىلگە تيەك ەتتى. قاتىسۋشىلاردى الدىڭعى وتكىزىلگەن ەكى كونفەرەنتسيانىڭ قورىتىندىلارىمەن تانىستىردى.
ودان كەيىن ءسوز العان الماتى ق. يۋنەسكو كلاستەرلىك بيۋروسىنىڭ كوممۋنيكاتسيا جانە اقپارات ءبولىمىنىڭ مامانى سەرگەي كارپوۆ باق دامۋىنداعى جاھاندىق تەندەنتسيالارعا بايلانىستى بايانداماسىندا باق ەركىندىگى، پليۋراليزم، جۋرناليستەردىڭ تاۋەلسىزدىگى جانە قاۋىپسىزدىگى سالاسىنداعى جاڭا تەندەنتسيالارعا سىني تالداۋ جاسادى.
بۇۇ-نىڭ قازاقستانداعى قوعامدىق اقپارات دەپارتامەنتىنىڭ ديرەكتورى ۆلاستيميل سامەك باق دامۋىنداعى قازاقستاننىڭ ەلەۋلى الەۋەتىن اتاپ ءوتتى: «ءبىز، ارينە، جۋرناليستيكانى وقىتۋ بويىنشا تەحنولوگيالىق، حالىقارالىق ستاندارتقا نەگىزدەلگەن باعدارلامالاردىڭ ەنگىزىلۋى مەن قولدانىلۋىنداعى ۇدەرىستەردى قولدايمىز. الەمدىك ستاندارت بويىنشا جۇمىس اتقاراتىن قازاقستاندىق جۋرناليستەر جاھاندىق اقپاراتتىق كەڭىستىكتە شەتەلدىك ارىپتەستەرمەن باسەكەگە قابىلەتتى بولادى».
قازاقستان جۋرناليستيكا اكادەمياسىنىڭ پرەزيدەنتى ساعىمباي قوزىباەۆ جۋرناليستەر دايارلاۋداعى ءبىلىم بەرۋ ۇدەرىسىنىڭ ساپاسى مەن دەڭگەيىن قاتاڭ باقىلاۋ قاجەتتىلىگىنە توقتالدى.
جيىندا بايانداما جاساپ، وزەكتى ويلارىن ورتاعا سالعان پروفەسسور ءلايلا احمەتوۆا، «ءادىل ءسوز» ءسوز بوستاندىعىن قورعاۋ حالىقارالىق قورىنىڭ ساراپشىسى عاليا اجەنوۆا، «Internews» ورتالىق ازياداعى وكىلدىگىنىڭ باسشىسى مارات بيگاليەۆ، وسى ۇيىمنىڭ جاڭا مەديا-كەڭەسشىسى اننا سۋكاچەۆا، زاڭگەرى ولگا ديدەنكو، «تۇركىتىلدەس جۋرناليستەر قورى» قق پرەزيدەنتى ءنازيا جويامەرگەنقىزى، «مىنبەر» جۋرناليستەردى قولداۋ ورتالىعىنىڭ پرەزيدەنتى ەسەنگۇل كاپقىزى، Factcheck.kz رەداكتورى دۋمان سماقوۆ ت.ب. جۋرناليستەر دايارلاۋ ءىسىن ۇنەمى جەتىلدىرىپ، الەمدىك ستاندارتقا ساي ساپالى دايارلاۋ قاجەت دەگەن ورتاق پىكىرگە توقتالدى.
