بۇگىن سەمەيدەگى «ەس-ايماق» رۋحاني ورتالىعىندا وبلىستىق ەتنومادەني بىرلەستىكتەر مەن قوعامدىق ينستيتۋتتار اراسىندا وتكەن «دوستىق-2025» بايقاۋىنىڭ جەڭىمپازدارىن ماراپاتتاۋ ءراسىمى ءوتتى.
سالتاناتتى شاراعا وبلىس اكىمى، اباي وبلىسى قازاقستان حالقى اسسامبلەياسىنىڭ توراعاسى بەرىك ءۋالي، ەتنومادەني بىرلەستىكتەردىڭ وكىلدەرى، قوعامدىق ۇيىم جەتەكشىلەرى قاتىستى.
«دوستىق-2025» بايقاۋى ازاماتتىق قوعامدى جۇيەلى تۇردە جاڭعىرتۋ، جالپىۇلتتىق قۇندىلىقتاردى دارىپتەۋ، سونداي-اق قازاقستان حالقى اسسامبلەياسىنىڭ 30 جىلدىعىن قورىتىندىلاۋ ماقساتىندا ۇيىمداستىرىلدى. شارا وڭىردەگى ەتنوسارالىق كەلىسىم مەن قوعامدىق بىرلىكتى نىعايتۋعا باعىتتالعان.
سالتاناتتى شارا بارىسىندا ءسوز سويلەگەن ايماق باسشىسى ەتنومادەني بىرلەستىكتەر مەن قوعامدىق ينستيتۋتتاردىڭ ەل بىرلىگى مەن قوعامدىق كەلىسىمدى نىعايتۋ جولىنداعى ەڭبەگىنىڭ ەرەكشە ەكەنىن اتاپ ءوتتى.
«دانا حالقىمىزدا «ىنتىماقتى ەلگە باق قونار» دەگەن اتالى ءسوز بار. ەل بىرلىگى – ەلدىگىمىزدىڭ ارقاۋى، تاۋەلسىزدىك تىرەگى! مەملەكەت باسشىسى قاسىم-جومارت كەمەلۇلى توقاەۆ: «بىرلىگىمىز – ەڭ باستى بايلىعىمىز» دەپ اتاپ وتكەندەي، ەلدىك مۇددە جولىندا بىرلەسىپ ەڭبەك ەتۋ – بارشامىزدىڭ باستى مىندەتىمىز. بۇل ۇستانىم جۋىردا پرەزيدەنتتىڭ جارلىعىمەن بەكىتىلگەن ىشكى ساياسات جونىندەگى ستراتەگيالىق قۇجاتتارىندا دا جالعاسىن تاپقان. «قازاقستان رەسپۋبليكاسىنىڭ ىشكى ساياساتىنىڭ نەگىزگى قاعيداتتارى، قۇندىلىقتارى مەن باعىتتارى» تۋرالى جارلىقتا «بىرلىك پەن ىنتىماق – قوعامداعى تۇراقتىلىق پەن ۇيلەسىمدىلىكتىڭ تۇعىرى سانالاتىن قۇندىلىقتار» دەپ ناقتى ايقىندالدى. ادال ەڭبەك، رياسىز كوڭىلدىڭ ارقاسىندا، سىزدەر تاتۋلىق پەن كەلىسىمنىڭ جارقىن ۇلگىسىن كورسەتىپ كەلەسىزدەر. سونىڭ دالەلى – بۇگىنگى «دوستىق» بايقاۋى. بۇل – وڭىرىمىزدەگى ەتنوس وكىلدەرىنىڭ مادەنيەتى مەن ءداستۇرىن قۇرمەتتەپ، ىنتىماق-بىرلىگىمىزدى نىعايتۋعا باعىتتالعان ماڭىزدى شارا. تەك اباي وبلىسىندا عانا وتكىزىلەتىن ماڭىزدى الاڭ دەسەك بولادى. قاشان دا بەلسەندى ازاماتتىق ۇستانىم، ەل تىنىشتىعى مەن ۇلت تۇتاستىعىن كوكسەگەن سىزدەردىڭ ەڭبەكتەرىڭىز وراسان زور!»، – دەدى وبلىس اكىمى.
ءىس-شارا بارىسىندا «دوستىق-2025» بايقاۋىنىڭ جەڭىمپازدارى «رۋحاني بىرلىك پەن جالپىۇلتتىق كەلىسىمدى دامىتۋعا قوسقان ۇلەسى ءۇشىن»، «ازاماتتىق قوعامدى دامىتۋعا قوسقان ۇلەسى ءۇشىن»، «قوعامداعى تاتۋلىق پەن ءوزارا قۇرمەتتى نىعايتۋعا قوسقان ۇلەسى ءۇشىن»، «مادەني مۇرا مەن ءداستۇردى ساقتاۋعا قوسقان ۇلەسى ءۇشىن»، «رۋحاني كەلىسىم مەن ۇرپاق ساباقتاستىعىنىڭ ۇلگىسى» نوميناتسيالارى بويىنشا ماراپاتتالدى. سونىمەن قاتار بىرقاتار ەتنومادەني بىرلەستىكتەر مەن قوعامدىق ۇيىم وكىلدەرىنە قازاقستان حالقى اسسامبلەياسىنىڭ جانە وبلىس اكىمىنىڭ العىس حاتتارى تابىستالدى.
ايتا كەتەيىك، بيىل ەلىمىزدە قازاقستان حالقى اسسامبلەياسىنىڭ 30 جىلدىعى اتالىپ وتۋدە.
كەش سوڭىندا امىرە قاشاۋباەۆ اتىنداعى مەملەكەتتىك فيلارمونيانىڭ كونتسەرتتىك باعدارلاماسى كورەرمەن نازارىنا ۇسىنىلدى.
