تۇركىستان قالاسىندا حالىقارالىق تالاپقا ساي سپورت كەشەندەرى سالىنۋدا، – دەپ حابارلايدى “ادىرنا” ۇلتتىق پورتالى وبلىس اكىمىنىڭ ءباسپاسوز قىزمەتىنە سىلتەمە جاساپ.
ءوڭىر باسشىسى ومىرزاق شوكەەۆ بىرقاتار قۇرىلىس نىسانىن ارالاپ، جۇمىس بارىسىمەن تانىستى.
بۇگىندە وڭىردە ەلىمىزدە تەڭدەسى جوق ەسكەك ەسۋ بازاسىنىڭ قۇرىلىسى ءجۇرىپ جاتىر. مۇندا ەسكەك ەسۋدەن وبلىسىمىز بەن ەلىمىزدىڭ ۇلتتىق قۇراماسى جاتىعىپ قانا قويماي، حالىقارالىق دودالار وتەدى دەپ جوسپارلانىپ وتىر.
نىسان بيىل پايدالانۋعا بەرىلمەك. وبلىس اكىمى جوبانى جۇزەگە اسىرۋ بارىسىندا سۋدى ۇنەمدەۋگە ءمان بەرۋ كەرەكتىگىن ەسكەرتتى.
«سۋ شارۋاشىلىعى ماماندارىن شاقىرىپ، جان-جاقتان سۋ تارتۋدىڭ قوسىمشا كوزدەرىن قاراستىرۋدى تاپسىرامىن. بۇل سپورتتىق جانە تۋريستىك كەشەندە دە سۋ ۇنەمدەۋ جۇيەسىن قولدانۋ كەرەك»، – دەدى ومىرزاق شوكەەۆ.
وبلىس اكىمى ودان كەيىن بەكزات ساتتارحانوۆ اتىنداعى سپورت كەشەنىنىڭ قۇرىلىس بارىسىن قاداعالادى.
ءا.نۇرماحانوۆ اتىنداعى وليمپيادا رەزەرۆىنىڭ مامانداندىرىلعان بالالار-جاسوسپىرىمدەر سپورت مەكتەبىنىڭ ۇجىمى ورنالاساتىن بۇل نىسان دا بيىل ەل يگىلىگىنە تاپسىرىلماق.
“ادىرنا” ۇلتتىق پورتالى
