بۇگىن الماتىدا ۋكراينانى قولداۋعا جينالعاندار بەيبىت ميتينگ وتكىزىپ جاتىر، دەپ حابارلايدى "ادىرنا" ۇلتتىق پورتالى.
Stan.kz مالىمدەۋىنشە، ميتينگىگە 200-دەي ادام جينالعان. ولاردىڭ قولدارىندا ۋكراين تۋىن ۇستاپ كەلگەن حالىق قولدارىندا “سوعىسقا جول جوق”، “ۋكراينا ءبىز بىرگەمىز”، “پۋتين كەت!” دەگەن جازۋى بار پلاكاتتار بار.
ايتا كەتەيىك، بۇل جيىندى وتكىزۋگە اكىمدىك رۇقسات ەتسە دە، الاڭدى باقىلاپ جۇرگەن بيلىك ادامدارى بايقالادى.
“بۇگىندە ۋكراينا تاۋەلسىزدىكتەن اسقان قۇندىلىق جوق ەكەنىن كورسەتىپ وتىر. تاۋەلسىزدىك ءۇشىن كۇرەستىڭ سيمۆولىن كورسەتىپ جاتىر. بىزدە ونداي قوعام بار ما؟ بىزدە وسىنداي ميتينگىلەرگە حالىق كوپتەپ كەلسە، ەلدىڭ ساياساتىنا ارالاسسا بىزدە دە سونداي قوعام قالىپتاسادى. سول ءۇشىن ەلىمىزدەگى كەز كەلگەن جاعدايعا ارالاسايىق. زەلەنسكي نەگە حالقىمەن بىرگە بولدى؟ 2014 جىلى ۋكراينا حالقى دەموكراتيالىق جولمەن ءوزىنىڭ باسشىسىن سايلادى. سوندىقتان دا ولاردىڭ باسشىسى حالقىمەن بىرگە ءجۇر. ال بىزدە پرەزيدەنتتى حالىق سايلاعان جوق، ونى تاعايىندادى. ايىرماشىلىق بار. ۋكراينا جەرىندە ءۇش كۇن سوعىستا 227 ادام قازا بولدى. بىزدە قاڭتار وقيعاسىندا ەكى كۇندە 227 قانداسىمىز قازا بولدى. تۇرمەلەر مەن تەرگەۋ يزولياتورلارىندا گەنوتسيد ءالى دە جالعاسىپ جاتىر. قاڭتار وقيعاسىن ۇمىتپايىق. سوعىس توقتاسىن! ءبىر ادامنىڭ ولگەنى ادامزاتتىڭ ولگەنى”، – دەيدى ەسجان ەسىمدى بەلسەندى.
ۋكراينا ەركىندىككە قول جەتكىزگەن مەملەكەت. ولار رەۆوليۋتسيا كەزىندە بەيبىت ميتينگتەر وتكىزۋگە قول جەتكىزدى. بيلىك ولارعا توقتاۋ سالا المادى. بۇل 90 جىلدارى بولاتىن.
"ادىرنا" ۇلتتىق پورتالى
