انتيكور قىزمەتكەرلەرىن قۋعان پاترۋلدىك پوليتسيا ەكيپاجى قاراعاندى وبلىسىنداعى قىزمەتىنەن بوساتىلدى. پوليتسەيلەردىڭ ءبىرى بەينەۇندەۋ جاسادى ، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
ۆيدەودا پوليتسەي ءوزىن جاڭابەك جۇمابەكپىن دەيدى. ونىڭ ايتۋىنشا، 2019 جىلدان باستاپ جاڭاارقا اۋدانىنىڭ پوليتسيا بولىمىندە جۇمىس ىستەيدى. پوليتسەيدىڭ سوزىنشە، انتيكور قىزمەتكەرىن قۋعاننا كەيىن ول قىزمەتىنەن بوساتىلعان.
"29 قاڭتاردا سىبايلاس جەمقورلىققا قارسى قىزمەت قىزمەتكەرى ماس كۇيدە كولىك جۇرگىزىپ، جول اپاتىنا ۇشىرادى، كەيىن وقيعا ورنىنان قاشىپ كەتتى. ونى توقتاتقان كەزدە الكوگول دەڭگەيىن ولشەيتىن قۇرىلعىعا ۇرلەۋدەن باس تارتتى. قىزمەتتىك وكىلەتىن اسىرا پايدالانىپ، قىزمەتكەرلەردى قورقىتۋعا تىرىستى، ولارعا بىلاپىت ءسوز ايتتى. بۇل ۆيدەوعا جازىلعان. وسىدان كەيىن ول قان تاپسىردى، ورتاشا ماس ەكەنى انىقتالدى. بىراق وسىعان قاراماستان، باسشىلىق بىزدەن حاتتاما جاساماۋدى جانە نومەنكلاتۋرالىق ىسكە جازباۋدى تالاپ ەتتى. ولاردىڭ ءبىرى - ۇستالعان ادامنىڭ قۇداسى. ءبىز بولعان وقيعانى جاسىرمادىق، ونى جوعارى باسشىلىققا جەتكىزدىك. وسىدان كەيىن مەنى جانە مەنىڭ سەرىكتەسىمدى قىزمەتتەن زاڭسىز بوساتتى", - دەيدى پوليتسيا قىزمەتكەرى ءوزىنىڭ ۆيدەوۇندەۋىندە.
سونداي-اق، پوليتسەي انتيكور قىزمەتكەرىنە قاتىستى ءالى كۇنگە دەيىن ەشقانداي شارا قولدانىلماعانىن مالىمدەدى. ول جاعدايدى انىقتاپ، ادىلەت ورناتۋدى سۇرادى. سونىمەن قاتار، پوليتسيا قىزمەتكەرى بۇعان دەيىن ەشقانداي تارتىپتىك جازاعا تارتىلماعانىن جانە ادال جۇمىس ىستەپ كەلگەنىن ايتتى.
قاراعاندى وبلىسى پوليتسيا دەپارتامەنتىنىڭ ءباسپاسوز قىزمەتى پوليتسەيدىڭ ۆيدەوۇندەۋىنە تۇسىنىك بەردى. ۆەدومستۆو وكىلدەرى اتقارىپ وتىرعان لاۋازىمىنان بوساۋى ونىڭ جۇمىستان شىققانى ەمەس ەكەنىن اتاپ ءوتتى.
"جاڭاارقا اۋدانىنىڭ پوليتسيا ءبولىمىنىڭ قىزمەتكەرلەرىنە قاتىستى قىزمەتتىك تەرگەۋ جۇرگىزىلدى. وعان اكىمشىلىك ءىس جۇرگىزۋ بويىنشا قىزمەتتىك ماتەريالدار مەن دالەلدەمەلەر تۇسىرىلگەن بەينەوجەتون جازباسىن تاراتقانى، نورماتيۆتىك ەمەس لەكسيكا قولدانعانى جانە مەملەكەتتىك قىزمەتشىنىڭ ەتيكاسىن بۇزعانى سەبەپ بولدى. تەرگەۋ ناتيجەلەرى بويىنشا پاترۋلدىك پوليتسيا ەكيپاجى تارتىپتىك جازاعا تارتىلىپ، اتقارىپ وتىرعان لاۋازىمىنان بوساتىلدى. بۇل قىزمەتكەرلەردەن باسقا، ولاردىڭ تىكەلەي باسشىلارى دا لاۋازىمدارىنان بوساتىلدى", - دەپ حابارلادى ۆەدومستۆو وكىلدەرى.
سونداي-اق، ءباسپاسوز قىزمەتىندەگىلەر پوليتسەي ارتىنان قۋعان 38 جاستاعى جۇرگىزۋشىگە قاتىستى اكىمشىلىك ماتەريال سوتقا جىبەرىلگەنىن قوستى.
ەسكە سالايىق، وقيعا جاڭاارقا اۋدانىندا بولعان. ۆيدەو اۆتورلارى جاسىرىنىپ قالۋعا تىرىسقان كولىكتە سىبايلاس جەمقورلىققا قارسى قىزمەتتىڭ جەزقازعاندىق قىزمەتكەرى ماس بولعانىن ايتىپ وتىر.
"ادىرنا" ۇلتتىق پورتالى
