قازاقستان پرەزيدەنتى قاسىم-جومارت توقاەۆ قازاقستاندىق ايەلدەردى حالىقارالىق ايەلدەر كۇنىمەن قۇتتىقتادى. جولداۋ Akorda.kz سايتىندا جاريالاندى، - دەپ حابارلايدى "ادىرنا" ۇلتتىق پورتالى.
"سىزدەردى حالىقارالىق ايەلدەر كۇنىمەن شىن جۇرەكتەن قۇتتىقتايمىن!
وسىناۋ شۋاقتى كوكتەم مەرەكەسى اسەمدىك پەن ادەمىلىكتىڭ، مەيىرىم مەن ماحابباتتىڭ سيمۆولىنا اينالدى. حالقىمىزدىڭ «ايەل ءبىر قولىمەن بەسىكتى تەربەتسە، ءبىر قولىمەن الەمدى تەربەتەدى» دەگەن ناقىل ءسوزىنىڭ تەرەڭ ءمان-ماڭىزى بار.
قازاقستاندا ايەلدەرگە بارلىق جاعداي جاسالعان. ولار ءبىلىم بەرۋ مەن دەنساۋلىق ساقتاۋ، مادەنيەت پەن سپورت، ءوندىرىس پەن قۇقىق قورعاۋ جانە باسقا دا سالالاردا تابىستى ەڭبەك ەتۋدە.
مەملەكەتتىك ورگاندار مەن ءىرى كومپانيالاردا باسشىلىق قىزمەت اتقاراتىن نەمەسە بيزنەس سالاسىندا كاسىبىن وركەندەتىپ جۇرگەن ايەلدەرىمىز از ەمەس. قىز-كەلىنشەكتەر ەلىمىزدىڭ قوعامدىق-ساياسي ومىرىنە دە بەلسەنە اتسالىسۋدا.
وسكەلەڭ ۇرپاققا ونەگەلى ءتالىم-تاربيە بەرۋ ىسىندە ايەلدەر ايرىقشا ءرول اتقارادى. اسىل انالاردىڭ ەڭبەگى قانداي قۇرمەتكە دە لايىق.
كەز-كەلگەن ىستە ايەلدەردىڭ كاسىبي بىلىكتىلىگى پەن جاۋاپكەرشىلىگى ايقىن اڭعارىلادى. ولار بارلىق ورتادا ۇندەستىك پەن ۇيلەسىمدى، ءوزارا تۇسىنىستىك پەن تاتۋلىقتى نىعايتۋعا ۇيىتقى بولادى.
ءبىزدىڭ ەلىمىز ساياسي وزگەرىستەر مەن جۇيەلى جاڭعىرۋ كەزەڭىنە قادام باستى. وسى ورايدا، ايەلدەر قاۋىمىنىڭ جاسامپازدىق قاسيەتى مەن كۇش-قۋاتى جاڭا قازاقستاننىڭ ىلگەرىلەۋىنە سەپتىگىن تيگىزەدى دەپ سەنەمىن.
بارشاڭىزعا زور دەنساۋلىق، باق-بەرەكە تىلەيمىن! - دەپ تۇيىندەدى توقاەۆ.
"ادىرنا" ۇلتتىق پورتالى
