بۇگىن حالىقارالىق تۇركى اكادەمياسىنىڭ ۇيىمداستىرۋىمەن تۇركى مەملەكەتتەرى اراسىندا ديپلوماتيالىق قاتىناستاردىڭ ورناعانىنا 30 جىل تولۋىنا وراي حالىقارالىق كونفەرەنتسيا ءوتتى.
القالى جيىننىڭ سالتاناتتى اشىلۋىنا حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇركى مەملەكەتتەرى ۇيىمىنىڭ تۇڭعىش باس حاتشىسى حاليل اكىندجى، ازەربايجان رەسپۋبليكاسىنىڭ العاشقى پرەمەر-ءمينيسترى گاسان گاسانوۆ، تۇركى مەملەكەتتەرى ۇيىمى اقساقالدار كەڭەسىنىڭ قازاقستان تاراپىنان وكىلى يكرام ادىربەكوۆ، ازەربايجان ۇلتتىق عىلىم اكادەمياسىنىڭ ءبىرىنشى ۆيتسە-پرەزيدەنتى يسا گابيبەيلى، سونىمەن قاتار ەلشىلەر، ديپلوماتتار، دەپۋتاتتار، عالىمدار مەن ساراپشىلار قاتىستى.
ونلاين فورماتتا وتكەن باسقوسۋدا باۋىرلاس مەملەكەتتەر تاۋەلسىزدىگىنىڭ جانە تۋىس ەلدەر ينتەگرتسياسىنىڭ 30 جىلدىعىنا ارنالعان «تۇركى دۇنيەسى - 30» اتتى جيناقتىڭ تانىستىرىلىمى ءوتتى. كىتاپتىڭ لەنتاسىن تمۇ اقساقالدار كەڭەسىنىڭ مۇشەسى يكرام ادىربەكوۆ پەن تۇركى اكادەميا باسشىسى دارحان قىدىرالى كەستى.
اتالعان كىتاپتا ءتۇبى ءبىر تۇركى ەلدەرى مەن حالىقتارى ىنتىماقتاستىعىنىڭ 30 جىلدىق بەلەسىندە ەلەۋلى ەڭبەك ەتكەن كورنەكتى مەملەكەت جانە قوعام قايراتكەرلەرى، حالىقارالىق ۇيىم باسشىلارى مەن ەلشىلەرى، ساراپشىلارى مەن عالىمدارىنىڭ ەستەلىكتەرى جانە پايىمدى پىكىرلەرى جيناقتالعان. جيناقتاعى ماقالالارعا باۋىرلاس ەلدەردىڭ ينتەگراتسيالىق ۇدەرىستەرى، سونىڭ ىشىندە عىلىمي-گۋمانيتارلىق ىنتىماقتاستىقتىڭ قايتا جاڭعىرۋى، قارقىندى دامۋى ارقاۋ بولعان.
ونلاين راسىمدە وتكەن كونفەرەنتسيانىڭ پلەنارلىق وتىرىسىنا تۇركيا عىلىم اكادەمياسىنىڭ اكادەميگى احمەد ادجار، قىرعىز-تۇرىك ماناس ۋنيۆەرسيتەتىنىڭ رەكتورى الپاسلان دجەيلان، ازەربايجان رەسپۋبليكاسى ميللي مەدجليسى مادەنيەت كوميتەتىنىڭ ءتورايىمى گانيرا پاشاەۆا، قىرعىز رەسپۋبليكاسىنىڭ جوكوركۋ كەنەشىنىڭ ەكس-دەپۋتات قانيبەك يماناليەۆ، ازەربايجان رەسپۋبليكاسى ميللي مەدجليسى دەپۋتاتى، ەۋروپالىق وداق-ازەربايجان پارلامەنتتىك ىنتىماقتاستىق كوميسسياسىنىڭ تەڭ توراعاسى دجيۆانشير فەيزيەۆ، ازەربايجان رەسپۋبليكاسى ميللي مەدجليسى دەپۋتاتى، ەكونوميكالىق جانە الەۋمەتتىك دامۋ ورتالىعىنىڭ (CESD) توراعاسى ۆۋگار بايراموۆ، وزبەكستان رەسپۋبليكاسى پرەزيدەنتى جانىنداعى ستراتەگيالىق جانە وڭىرارالىق زەرتتەۋلەر ينستيتۋتى ديرەكتورىنىڭ ورىنباسارى سانۆار ۆاليەۆ، ەۋرازيالىق ەكونوميكالىق بايلانىستار قاۋىمداستىعىنىڭ توراعاسى حيكمەت ەرەن، «قوعامدىق پىكىر» ينستيتۋتىنىڭ جوبا جەتەكشىسى بوتاگوز راقىشەۆا، وزبەكستان عىلىم اكادەمياسى ۇلتتىق ارحەولوگيا ورتالىعىنىڭ ۆيتسە-پرەزيدەنتى گايبۋللا باباياروۆ، سونىمەن قاتار تانىمال عالىمدار قاتىسىپ، باياندامالار جاسادى.
پلەنارلىق وتىرىسقا حالىقارالىق تۇركى اكادەمياسىنىڭ ۆيتسە-پرەزيدەنتى فيزۋلي مادجيدلي مودەراتورلىق ەتتى.
“ادىرنا” ۇلتتىق پورتالى
