ساۋدا جانە ينتەگراتسيا مينيسترلىگى قازاقستاندا قانت جەتكىلىكتى ەكەنىن مالىمدەپ، حالىقتان سەبەپسىز دۇرلىكپەۋدى سۇرادى، دەپ حابارلايدى "ادىرنا" ۇلتتىق پورتالى.
"بۇگىنگى كۇنى ەلدە قانت تاپشىلىعى جوق. ساۋدا جەلىلەرى مەن تۇراقتاندىرۋ قورلارىندا الەۋمەتتىك ماڭىزى بار ازىق-تۇلىك تاۋارىنىڭ قورى كەمى ءۇش ايعا جەتەدى. سونىمەن قاتار قانت ءوندىرىسى جالعاسىپ جاتىر، توقتامايدى! قور تولتىرىلىپ وتىرادى. ياعني ء"ۇش ايدان كەيىن قور تاۋسىلادى، قانت تاپشىلىعى بولادى" دەگەن اقپارات شىندىققا جاناسپايدى". ەلدەگى قانت وندىرىسىنەن بولەك، وزگە ەلدەردەن يمپورتتاۋ مۇمكىندىگى بار. سوندىقتان اجيوتاجعا ەرىك بەرمەۋگە شاقىرامىز، - دەپ مالىمدەدى ساۋدا جانە ينتەگراتسيا مينيسترلىگىنىڭ رەسمي وكىلى الىشەر ومىرزاق.
ەستەرىڭىزگە سالا كەتەيىك، بۇعان دەيىن الەۋمەتتىك جەلىدە قازاقستاننىڭ ءىرى ساۋدا ورىندارىندا قازاقستاندىقتاردىڭ جاپپاي قانت ساتىپ الىپ جاتقانى حابارلانعان ەدى. جۋىردا ساۋدا جانە ينتەگراتسيا مينيسترلىگى قازاقستاندا ءۇش ايعا جەتەتىن قانت قورى بار ەكەنىن مالىمدەدى. ەكونوميكالىق سانكتسيالارعا بايلانىستى رەسەي بيلىگى جارتى جىلعا قانت ەكسپورتىنا تىيىم سالعان ەدى.
Stan.kz مالىمەتىنشە، ءدال سول كۇنى جانە ەرتەسىنە قازاقستاننىڭ كوپتەگەن قالاسىندا قانت ەڭ كوپ سۇرانىسقا يە ونىمگە اينالدى. باعاسى دا شارىقتادى. ساتۋشىلار ءبىر ادامعا ساتىلاتىن تاۋار كولەمىنە شەكتەۋ ەنگىزە باستادى. مىسالى، كوكشەتاۋدا سۋپەرماركەتتەردىڭ بىرىندە قانتقا كەزەكتە تۇرعان ساتىپ الۋشىلار اراسىندا توبەلەس شىعا جازدادى. قاراعاندى مەن تەمىرتاۋدا دا دۇرلىگۋ بايقالدى: ساتۋشىلار قانتتى سورەگە قويا بەرگەنى سول ەدى، ادامدار تالاپ اكەتتى. پابليكتەردىڭ بىرىندە قانتتىڭ ءبىر كەلىسى 500 تەڭگەگە جەتكەنى جازىلدى. سولتۇستىك قازاقستان وبلىسىندا قانتتىڭ ءبىر كەلىسى 420 تەڭگەگە دەيىن قىمباتتادى. پاۆلوداردا دا كەشەدەن بەرى دۇرلىگۋ بايقالادى. ساۋدا ورىنداردىڭ بىرىندە قانتتى 4,5 كگ كەلىدەن ۇلەستەپ ساتىپ جاتىر.
پوسموترەت ەتۋ پۋبليكاتسيۋ ۆ Instagram
"ادىرنا" ۇلتتىق پورتالى
