ءماجىلىس دەپۋتاتى ايدوس سارىم جۋرناليست نارتاي ارالبايۇلىنا سۇحبات بەرىپ، ۋكرايناداعى جاعداي، قازاقستاننىڭ بيلىگى، بايقوڭىرداعى جاعدايعا قاتىستى پىكىر ءبىلدىردى دەپ حابارلايدى "ادىرنا" ۇلتتىق پورتالى turkystan.kz-كە سىلتەمە جاساپ.
«ءبىزدىڭ قوعام قۋعانعا دا، قاشقانعا دا سەرىك. ءوز ومىرلەرىن ءسۇرىپ جاتقان جوق. بىرەۋدىڭ سوعىسىنا ىلەسكىسى كەلەدى. وزىمىزدەگى ءومىر قايعىلى، مۇڭدى بولىپ كورىنە مە؟ ءوز ءومىرىمىزدى ءسۇرۋدىڭ ورنىنا الەۋمەتتىك جەلىلەردىڭ الگوريتمى ايداپ سالعان تاقىرىپتارعا جاقىنداي بەرەمىز. بۇل – ۇلكەن قاتەلىك. قالاي دەگەندە دە قازاقستاننىڭ وزىندىك ورنى بار. قازاقستان ايۋ مەن ايداھاردان، يسلام الەمى مەن باتىس الەمىنەن امان قالۋ ءۇشىن وزىندىك ويىن ويناۋى كەرەك»، – دەدى ول.
سۇحبات بارىسىندا دەپۋتات قازاقتاردىڭ ءوز تاريحىن دا وقىماعانىن ايتىپ، تاريحتىڭ جارتىسى ميفتەن قۇرالعانىن جەتكىزدى.
«ءبىزدىڭ قازاق ءوز تاريحىن دا وقىماعان. ءبىزدىڭ قازاقتىڭ باسىنداعى تاريحى – ميفتەن قۇرالعان جالعان تاريح. قازىر قازاقتار ايتىپ جۇرگەن اڭگىمەنىڭ 70 پايىزى ميف ەكەنىن دالەلدەپ بەرە الامىن. قازاق باتىر بولعان، داۋلەتتى بولعان، بىراق ءبىز ويلاپ جۇرگەندەي التىن عاسىر بولماعان»، – دەدى دەپۋتات.
