بۇل تۋرالى «اقيقات» قوعامدىق كوميسسياسىنىڭ ءتورايىمى ايمان وماروۆا كوميسسيانىڭ بىراپتالىق جۇمىسىن قورىتىندىلاۋ كەزىندە ايتتى، دەپ حابارلايدى "ادىرنا" ۇلتتىق پورتالى baq.kz-كە سىلتەمە جاساپ.
ونىڭ ايتۋىنشا، الماتىداعى تەرگەۋ يزولياتورىندا وتىرعان ءۇش ستۋدەنت ازامات امانگەلديەۆ، ازات ءۋالي جانە داستان جايىلعانوۆقا قاتىستى بۇلتارتپاۋ شارالارى وزگەرتىلىپ، ۇيقاماققا اۋىستىرىلعان.
ولارعا قر قك-ءنىڭ 272-بابىنىڭ ەكىنشى بولىگى بويىنشا ايىپ تاعىلعان. سوت ولاردىڭ قارۋ-جاراق تاسىعانىن كورسەتەتىن ۆيدەولاردى العا تارتتى. الايدا ولار ءماجبۇرلى تۇردە بارعان. ياعني دايىندالعان قارۋلى ادامداردىڭ قورقىتۋىمەن 5 قاڭتاردا الاڭعا بارىپ، زاڭسىز ارەكەتتەر جاساعان. ميتينگكە قارۋمەن قورقىتىپ اپارعانى تۋرالى باسقا دا ادامدار ايتىپ جاتىر. سوندىقتان ءبىز بۇل بالالارعا قاتىستى ءىستى توقتاتۋدى ۇسىنعان ەدىك، – دەدى ايمان وماروۆا.
بالالاردىڭ ايتۋىنشا ولار بەسەۋ بولعان، بىرەۋىن اتىپ تاستاعان جانە قورقىتقان. ماسكا كيگەن قارۋلى ادامدار ءبىر-بىرىمەن باسقا تىلمەن سويلەسكەن، سوندىقتان ولاردىڭ ايتقانىن ىستەۋگە تۋرا كەلگەن.
كوميسسيا ءتورايىمى وسى ىسكە نازار اۋدارىپ، وتىنىشتەرىنە قۇلاق اسقان پروكۋراتۋرا مەن وزگە دە جاۋاپتى ادامدارعا العىس ءبىلدىردى.
سونىمەن قاتار ول اتىراۋدا قاڭتار وقيعاسىنا قاتىستى قاماۋدا وتىرعان ەسجانوۆ ەرقانات، ەركەبۇلان بالتاباەۆ، مەدەت نارىشەۆقا قاتىستى بۇلتارتپاۋ شارالارى وزگەرتىلىپ، ۇيقاماققا اۋىستىرىلعانىن جەتكىزدى.
"ادىرنا" ۇلتتىق پورتالى
